“Tolibon” Birlashgan Millatlari Tashkilotining afg‘on xodimlariga soqol o‘stirishni buyurdi. Bu haqda manbalarga tayanib, Amu TV xabar berdi.
Manbalarga ko‘ra, “Tolibon” rasmiylari 8-fevral kuni Hirotdagi Islom Qal’a markaziga tashrif buyurib, erkak xodimlarni soqol oldirish yoki qisqartirish qamoq jazosiga olib kelishi haqida ogohlantirgan. Ogohlantirish Afg‘onistondagi gumanitar operatsiyalar uchun qiyinchiliklar ortib borayotgan bir paytda e’lon qilindi.
2023-yil aprel oyida esa “Tolibon” ayollarga BMT tashkilotida ishlashni taqiqlagan edi. Mazkur qiyinchiliklar fonida 72 ta insonparvarlik loyihasi to‘xtatilgan, ikkita tashabbus butunlay bekor qilingan va bitta muassasa yopildi.
2021-yilda “Tolibon” hokimiyatga kelishi bilan Afg‘onistonda erkaklarga soqol olishni taqiqlagan. Tegishli bayonotida sartaroshxona va jamoat hammomlarida soqol olish hamda musiqa chalish qat’iyan taqiqlanishi aytilgan.
“Agar sartaroshxona yoki umumiy hammomda kimdir soqolini oldirgani yoki u yerda musiqa chalgani aniqlansa, aybdorlarga nisbatan shariat qonunlariga muvofiq ish ko‘riladi va ularning shikoyat qilishga haqqi bo‘lmaydi”, deyilgan bayonotda.
2023-yil Afg‘onistonda soqol o‘stirish buyrug‘iga bo‘ysunmagan va shu bilan islom qonunlariga rioya etmagan 280 dan ortiq politsiyachi ishdan bo‘shatilgan. Shu yili “Tolibon” o‘qituvchilarning soqoli yo‘qligi uchun ikkita maktabni yopgan. Maktablarni yopish to‘g‘risidagi qarorning yana bir sababi o‘qituvchilarning hijob o‘rash me’yorlariga rioya qilmagani ham bo‘lishi mumkin.
Izoh (0)