AQSH harbiy-dengiz kuchlarining “Karl Vinson” aviatashuvchisi va uning zarbdor guruhi Janubiy Koreyaning Pusan portiga yetib keldi. Bunga javoban Shimoliy Koreya yetakchisining singlisi Kim Yo Chjon AQSHga tahdid qildi.
Kim Yo Chjon bunday “provokatsiyalar”ga Shimoliy Koreya javob qaytarishidan ogohlantirgan. Bu, ehtimol, qurol sinovlari bo‘yicha faoliyatni kuchaytirishni va AQSHga nisbatan qarama-qarshi pozitsiyasini saqlab qolishni anglatadi.
Kim Yo Chjonning ta’kidlashicha, yarimorolga Amerikaning atom suv osti kemalari ham, bombardimonchi samolyotlari ham kelib turadi. Shuningdek, AQSH va Janubiy Koreya o‘rtasida ko‘plab harbiy mashg‘ulotlar, yadroviy masalalar bo‘yicha maslahat guruhi yig‘ilishlari tashkil etilgan.
Koreya yarimorolidagi vaziyatning keskinlashuvining asl sababi, shubhasiz, AQSH va uning ittifoqchilarining fitnalaridir. Ular NATO infratuzilmasini bu mintaqaga ko‘chirish va urushga tayyorgarlik darajasini oshirishga qaratilgan harakatlarini yanada faollashtirayotgani ko‘rinib turibdi, dedi u.
Shimoliy Koreya rahbarining singlisi Pxenyan yadroviy urushni jilovlash vositalarini cheksiz kuchaytirishi uchun bir nechta muhim sabablarga egaligini aytdi.
Biz qo‘l qovushtirib o‘tirmaymiz va faqat vaziyatga izoh beramiz. Agar AQSH harbiy kuchlarni namoyish qilish bo‘yicha rekordni yangilashda davom etsa, unda biz ham strategik tiyib turish kuchlarini qo‘llash bo‘yicha rekordni yangilashimizga to‘g‘ri keladi, deya xulosa qildi u.
Kim Yo Chjon Shimoliy Koreyaning o‘z suverenitetini himoya qilish irodasi va qobiliyatini tekshirish “juda xavfli” ekanini qo‘shimcha qildi.
Janubiy Koreya bunga javoban KXDR rasmiylarini o‘z harakatlari uchun “beparvolik bilan aybni Seulga yuklashda” aybladi. Mudofaa vazirligi mamlakatlar Pxenyan shu yo‘l bilan o‘zining “harbiy provokatsiyalarini” oqlashga urinayotganini ta’kidladi.
Izoh (0)