Shimoliy Koreya rahbari Kim Chen In yadro materiallari ishlab chiqaruvchi korxona va yadro qurollari ilmiy-tadqiqot institutiga tashrif buyurdi. Bu haqda Associated Press xabar berdi.
U qurol-yarog‘ turidagi yadroviy materiallar ishlab chiqarishni ko‘paytirish zarurligini ta’kidladi.
“Hozirgi ko‘tarinki ruhni yanada kuchaytirish, qurol-yarog‘ turidagi yadroviy materiallar ishlab chiqarish rejasini oshirib bajarish va mamlakatning yadroviy qalqonini mustahkamlashda tarixiy yutuqlarga erishish lozim”, degan KXDR yetakchisi.
Kimning tashrifi, Koreya yarim orolini yadrosizlantirish bo‘yicha xalqaro sa’y-harakatlarga qaramay, uning hamon yadroviy dasturni rivojlantirishga e’tibor qaratayotganini ko‘rsatmoqda.
“BMT bu harakatlardan tashvishda, chunki ular yadroviy qurolsizlanish va yadro qurolini tarqatmaslik bo‘yicha global tartibiga putur yetkazmoqda”, degan BMT bosh kotibi o‘rinbosari Rozmari Dikarlo.
Tramp va Kim Chen In
AQSH prezidenti Donald Tramp bir necha kun avval Kim Chen In bilan muloqotni qayta tiklash niyatida ekanini aytgandi. O‘zining birinchi muddati davomida u Shimoliy Koreya yetakchisi bilan bir necha bor uchrashgan. AQSH Milliy xavfsizlik kengashi vakili Brayan Xyuz prezident Shimoliy Koreyani to‘liq denuklearizatsiya qilishga erishishini tasdiqladi.
Trampning inauguratsiyasidan bir necha kun oldin Pxenyan bir nechta qisqa masofali ballistik raketalarni uchirdi. Ko‘pgina tahlilchilar Shimoliy Koreya rahbariyatining harakatlarini Qo‘shma Shtatlardan sanksiyalarni yumshatish va siyosiy yon berishlarga erishishga qaratilgan strategiyaning bir qismi sifatida ko‘rmoqda.
Izoh (0)