Ukrainaga qarshi uch yillik keng ko‘lamli urushdan so‘ng, Rossiya 2022-yilgacha bo‘lgan davrga nisbatan ancha zaiflashdi. Bu haqda NATOning yuqori lavozimli amaldoriga tayanib, Deutsche Welle xabar berdi.
U Rossiya armiyasining Ukrainaga qarshi urushdagi odam yo‘qotishlarini hayratlanarli deb atadi. NATO hisob-kitoblariga ko‘ra, so‘nggi oylarda Rossiya har kuni 1000-1500 kishini yo‘qotmoqda.
“Bu raqamlarni arzimas deb hisoblash uchun inson hayotiga dahshatli darajada e’tiborsiz bo‘lish kerak. Ko‘pchiligimiz bugungi Rossiyaning yoshlar hayotini behuda sarflashga, o‘lim va vayronagarchilik keltirishga tayyorligidan tashvishdamiz. Buni ko‘rish o‘ta og‘riqli”, dedi alyans xodimi.
NATO vakilining so‘zlariga ko‘ra, Rossiya prezidenti Vladimir Putin harbiy qudratga e’tibor qaratib, boshqa sohalarni butunlay e’tibordan chetda qoldirmoqda va ularni “qurbon qilmoqda”. Ammo shunda ham u Ukrainadagi harbiy maqsadlariga erisha olmadi, erishgan natijalari esa uning ittifoqchilari, jumladan Shimoliy Koreya va Eron yordami tufayli bo‘ldi.
“Rossiya har kuni shuncha odamni qurbon qila olishi va harbiy harakatlarni shu darajada davom ettira olishiga ishonmayman. Buning vaqt chegarasi bor, dedi amaldor.
Uning fikricha, gap bir necha yil haqida ketmoqda, chunki Rossiyadagi iqtisodiyot va siyosiy tizimning bunday yukni uzoqroq ko‘tara olishiga shubha mavjud.
“Ukrainaning NATOga a’zoligi — eng foydali va xavfsiz variant”
NATOning yuqori martabali amaldori Ukraina haqida gapirar ekan, uning G‘arbdagi qo‘llab-quvvatlashi susaymagani haqida ta’kidladi. Bundan tashqari, Ukrainaga yordam ko‘rsatish Shimoliy Atlantika alyansining asosiy siyosiy yo‘nalishlaridan biri hisoblanadi.
Agar biz Ukrainani qo‘llab-quvvatlashning bu darajasini saqlab qola olsak, agar NATO yagona bo‘lib qolsa, unda biz Rossiya reaksiyasini ko‘ramiz, dedi u.
Boshqa manbalar kabi, u ham alyansda AQSHning yangi administratsiyasining bu boradagi pozitsiyasi shakllanishi kutilayotganini va Amerika tomoni ittifoqchilarni tinglashga tayyor ekanini qayd etdi.
Amaldorning tushuntirishicha, NATO “Vashington bilan alyansning 32 a’zosidan biri, garchi eng yirigi bo‘lsa-da, umumiy pozitsiyaga kelish va kelgusi siyosatni shakllantirish uchun ishlaydi”.
2024-yilgi Vashington sammiti qarorida ko‘rsatilgan Ukrainaning kelajakdagi a’zoligiga kelsak, NATO hozircha aniq muddatlarni muhokama qilmayapti. Shunga qaramay, ular “Ukrainaning NATOga a’zo bo‘lishi kelajak uchun eng iqtisodiy samarali va xavfsiz variant” ekanligiga ishonadi.
Izoh (0)