Buyuk Britaniya urush tugab, tinchlik shartnomasi imzolangandan so‘ng Ukraina osmonida patrullik qilish uchun Typhoon qiruvchi samolyotlaridan foydalanishi mumkin. Bu haqda Britaniya hukumati va Qirollik havo kuchlaridagi manbalarga tayanib, The Times xabar berdi.
Britaniya NATO dasturiga o‘xshash Ukraina uchun “havo politsiyasi” tashkil etishni muhokama qilmoqda. Bu dasturga ko‘ra, alyans 2004-yildan beri Boltiqbo‘yi davlatlari havo hududini himoya qilib keladi.
Bunday variant Ukraina ustida parvozlar taqiqlangan hudud yaratishdan ko‘ra ehtimoli ko‘proq, chunki so‘nggi holatda samolyotlar Ukraina osmonida kecha-yu kunduz patrullik qilishi kerak bo‘ladi, deya aniqlik kiritdi manbalardan biri.
Taxminlarga ko‘ra, “politsiya missiyasi”da Polshada joylashtirilishi rejalashtirilgan o‘nlab “tish-tirnog‘igacha qurollangan” va doim parvozga shay turuvchi qiruvchi samolyotlar ishtirok etadi.
Bunday qaror Ukraina uchun xavfsizlik kafolatlarining bir qismi bo‘lishi mumkin, shuningdek, quruqlikda tinchlik shartnomalariga rioya etilishini nazorat qilish uchun kamroq harbiy kontingentni jalb qilish imkonini beradi.
Shu bilan birga, Buyuk Britaniya buning uchun ko‘plab samolyotlar va havo hujumidan mudofaa tizimlarini jalb etishi kerak. Bu masalani muhokama qilish boshlang‘ich bosqichda. Biroq The Times gazetasining Qirollik harbiy-havo kuchlaridagi suhbatdoshi “Bizga nima deyishsa, barchasini bajarishga tayyormiz”, deya ta’kidladi.
Urushdan so‘ng Ukrainaga 100 ming tinchlikparvar kuchlar kerak
Avvalroq prezident Vladimir Zelenskiy urush tugaganidan keyin mamlakatda Rossiyaning takroriy tajovuzining oldini oladigan 100 ming yevropalik tinchlikparvar kuchlar kerakligini aytgan edi. Biroq, Washington Post ma’lumotlariga ko‘ra, Yevropa ittifoqi faqat 25-30 ming harbiy xizmatchini yuborishi mumkin.
Germaniya, Italiya va Polsha bu qarorning o‘rinli ekaniga shubha qilmoqda. Fransiya esa tinchlikparvar kuchlarni Rossiya armiyasi bilan to‘qnashuv chizig‘iga emas, balki “nizoli bo‘lmagan hududlar”ga yubormoqchi.
AQSH prezidenti Donald Tramp Yevropa tinchlikparvar kuchlarini Ukrainada joylashtirish g‘oyasini qo‘llab-quvvatlagan. Ammo amerikalik harbiylar yuborilmasligini aytgan.
Rossiya tashqi ishlar vaziri Sergey Lavrov Yevropa kuchlarini Ukrainaga kiritish bo‘yicha takliflar Moskvaga ma’qul emasligini ta’kidlagan. Bu masala AQSH va Rossiyaning urush boshlanganidan beri birinchi rasmiy muzokaralarida muhokama qilingan.
Lavrovning so‘zlariga ko‘ra, Rossiya tomoni amerikalik hamkasblariga NATO davlatlari qo‘shinlarining Ukraina hududida bo‘lishi, hatto “begona bayroq ostida, Yevropa ittifoqi bayrog‘i yoki milliy bayroqlar ostida” ham qabul qilinishi mumkin emasligini yetkazgan.
Ma’lumot o‘rnida, Rossiya Ukraina armiyasiga qarshi jang qilish uchun Kursk viloyatiga Shimoliy Koreya harbiylarini yuborgan.
Izoh (0)