Kiyev ma’lumotlariga ko‘ra, Shimoliy Koreya harbiylari bir necha hafta davom etgan tanaffusdan so‘ng Kursk viloyatida yana faol jangovar harakatlarga qaytgan. Bu haqda Ukraina prezidenti Vladimir Zelenskiy vatandoshlariga an’anaviy kechki videomurojaatida, shuningdek, Reuters agentligiga bergan intervyusida aytib o‘tdi.
Kursk operatsiyasi hududlarida yangi hujumlar bo‘ldi — Rossiya armiyasi yana Shimoliy Koreya askarlarini jalb qildi, dedi Ukraina rahbari.
Zelenskiyning so‘zlariga ko‘ra, Kursk yaqinidagi janglarda “ko‘plab bosqinchilar”, xususan, rus va Shimoliy Koreya harbiylari yo‘q qilingan.
Uning qo‘shimcha qilishicha, Kursk viloyatida 60 ming rossiyalik harbiylar to‘plangan.
Joriy yilning 30-yanvar kuni The New York Times gazetasi Shimoliy Koreya harbiylari og‘ir yo‘qotishlardan so‘ng Kursk viloyatida front chizig‘idan olib ketilgani haqida yozgan edi. Ukraina va AQSH rasmiylaridan iborat nashr suhbatdoshlarining so‘zlariga ko‘ra, bu vaqtga kelib KXDR harbiy xizmatchilari ikki haftacha frontda ko‘rinmagan. Keyinroq bu ma’lumotni Ukraina maxsus operatsiya kuchlari, shuningdek, Janubiy Koreya razvedkasi tasdiqladi.
Ukraina armiyasi Bosh shtabining hisob-kitoblariga ko‘ra, KXDRning Kursk viloyatidagi kontingentining umumiy yo‘qotishlari 4000 ga yaqin kishini tashkil etdi: Shimoliy Koreyaning uchta shartli brigadasidan biri amalda yo‘q qilingan, ikkitasi jangovar qobiliyatini yo‘qotgan.
Rossiya va KXDR hamkorligi
Rossiya va Shimoliy Koreya urush boshlanganidan keyin harbiy sohadagi hamkorlikni kuchaytira boshladi. 2024-yil iyun oyida Rossiya prezidenti Vladimir Putin Shimoliy Koreyaga tashrif buyurib, Kim Chen In bilan hujum sodir bo‘lgan taqdirda bir-birini qo‘llab-quvvatlashni nazarda tutuvchi, shuningdek, G‘arb sanksiyalariga qarshi hamkorlikni o‘z ichiga olgan keng qamrovli strategik shartnoma imzolagandi.
Ukraina armiyasi Kursk viloyatida shimoliy koreyalik ikki askarni asirga olgan. Prezident Vladimir Zelenskiy 12-yanvar kuni ular so‘roqqa tutilgani aks etgan videoni e’lon qildi. So‘roq paytida KXDR askarlari qayerdaligini bilmasligi, ularga bu faqat o‘quv mashg‘uloti deb aytilganini ta’kidlagan.
Izoh (0)