Rossiya Ukrainaga qarshi urushda foydalanayotgan Shimoliy Koreya ballistik raketalari 2024-yil dekabr oyi oxiridan boshlab ancha aniqroq harakatlana boshladi. Bu haqda Reuters Ukrainaning ikki yuqori martabali manbasiga tayanib yozmoqda.
Ularning so‘zlariga ko‘ra, so‘nggi bir necha hafta ichida Ukraina bo‘ylab otilgan snaryadlar mo‘ljallangan nishonga ko‘pi bilan 50-100 metrga og‘ib zarba bera boshlagan, ilgari bu ko‘rsatkich 1-3 km ni tashkil qilgan.
Bu KXDR o‘z raketa texnologiyalarini sinovdan o‘tkazish uchun jang maydonidan muvaffaqiyatli foydalanayotganidan dalolat beradi, deydi Reuters’ning armiya va Ukraina hukumatidagi suhbatdoshlari anonimlik sharti bilan.
Seuldagi Asan siyosiy tadqiqotlar instituti qurol-yarog‘ bo‘yicha eksperti Yan Ukning agentlikka aytishicha, uning Ukrainadagi manbalari ham KXDR Rossiyaga topshirgan so‘nggi raketalar partiyasining xususiyatlari yaxshilanganini tasdiqlamoqda.
Ular raketalarni ishlab chiqargani va buyurtmachilar hisoblanmish Rossiya armiyasidan fikr-mulohazalar olgani sababli ularda yanada ishonchli raketalarni yaratish uchun zarur bo‘lgan tajriba paydo bo‘ladi, deya tushuntirdi ekspert.
Yan Ukning ogohlantirishicha, Shimoliy Koreya raketalarining bunday takomillashtirilishi “xavotirli oqibatlarga olib keladi”, chunki u Janubiy Koreya, Yaponiya va AQSH xavfsizligiga tahdid soladi. Bundan tashqari, uning so‘zlariga ko‘ra, KXDR o‘zining modernizatsiya qilingan qurollarini “qodir bo‘lmagan davlatlar yoki qurolli guruhlarga sotishi mumkin.
Bu mintaqa va dunyoda barqarorlikka jiddiy ta’sir ko‘rsatishi mumkin, deya qo‘shimcha qildi u.
Reuters suhbatdoshlariga ko‘ra, Shimoliy Koreya o‘z raketalarining ko‘rsatkichlarini yaxshilash uchun aynan qanday o‘zgarishlar kiritgani noma’lum. Agentlik manbalaridan birining ta’kidlashicha, hozircha qoldiqlar ekspertizasi Shimoliy Koreya raketalarining dizaynida hech qanday o‘zgarishlarni aniqlashga imkon bermagan, biroq ular yanada takomillashgan navigatsiya tizimlari yoki manyovr qilishni osonlashtiradigan rul mexanizmi bilan jihozlangan bo‘lishi mumkin.
Rossiya 2023-yil oxirida Shimoliy Koreyaning Ukrainaga qarshi K-23, K-23A va K-24 qisqa masofali ballistik raketalarini uchirishni boshladi va o‘shandan beri 100 ga yaqin snaryad uchirdi, dedi harbiy manba.
Aniqlanishicha, Shimoliy Koreya ballistik raketalari Rossiya raketa zarbalarining kichik bir qismini tashkil etsa-da, ular og‘irligi bir tonnagacha bo‘lgan yirik kallakni olib yuradi va 800 km gacha masofaga ucha oladi. Rossiyaning shunga o‘xshash Iskander-M raketasi kamroq foydali yukni ko‘taradi va 500 km masofani bosib o‘tadi.
Izoh (0)