Shimoliy Koreya 26-yanvar kuni strategik qanotli boshqariladigan raketalarni sinovdan o‘tkazdi. Bu haqda Markaziy telegraf agentligi xabar berdi.
Shimoliy Koreya harbiylari tomonidan qo‘llanadigan “strategik” ta’rifi bunday raketalar yadroviy qurolga egaligini anglatadi.
“Uchirilgan strategik qanotli raketalar 7,507-7,511 soniya ichida 1500 kilometrlik oval va 8 shaklida trayektoriya bo‘ylab uchib, keyin nishonga aniq tegdi. Muhim qurollarni sinash qo‘shni davlatlar xavfsizligiga hech qanday salbiy ta’sir ko‘rsatmadi”, deyiladi xabarda.
Sinovlarda ishtirok etgan KXDR rahbari Kim Chen In “uzoq muddatli va abadiy tinchlik hamda barqarorlikni ta’minlash” bo‘yicha “muhim vazifani mas’uliyat bilan bajarish”ga so‘z berdi.
Janubiy Koreya harbiy kuchlari KXDRdan Sariq dengiz tomon bir nechta qanotli raketalar uchirilganini tasdiqladi. Ularning xususiyatlari hozirda AQSH va Janubiy Koreya razvedka xizmatlari tomonidan o‘rganilmoqda.
KXDR Tashqi ishlar vazirligining AQSH va Janubiy Koreyaga qarshi bayonoti
26-yanvar kuni Shimoliy Koreya Tashqi ishlar vazirligi AQSH va Janubiy Koreyaga nisbatan ancha keskin bayonot e’lon qildi. Hujjatda ta’kidlanishicha, ular “harbiy provokatsiyalarning sezilarli darajada kuchayishi oqibatida mintaqadagi vaziyatning yomonlashuvi uchun javobgarlikdan qochib qutula olmaydi”.
Shimoliy Koreya Tashqi ishlar vazirligi AQSH va Janubiy Koreyaning so‘nggi paytlarda o‘tkazilgan harbiy mashg‘ulotlarini sanab o‘tib, ularni “KXDRga qarshi tashvishli harbiy provokatsiyalar” sifatida baholadi.
“Bunday harakatlarga javoban ko‘zguli choralar ko‘riladi. Koreya yarimoroli va mintaqadagi xavfsizlik holati kundan kunga yomonlashib borayotganining asosiy sababi aynan AQSHning harbiy ustunlikka erishish uchun bor kuchini sarflayotganidir”, deyiladi bayonotda.
Pxenyan “AQSHga faqat o‘ta qat’iy choralar bilan qarshilik ko‘rsatishini” va’da qilmoqda.
Izoh (0)