Shveysariya Tashqi ishlar vazirligi ilk marta Ukraina Qurolli kuchlari safida jang qilgan o‘z fuqarosining halok bo‘lganini tasdiqladi. Bu haqda Shveysariya radio va televideniyesi (SRF) portali tashqi siyosat idorasining matbuot xizmatiga asoslanib xabar berdi.
Shveysariyaning Kiyevdagi elchixonasiga yil boshida Ukraina harbiy qo‘mondonligi tomonidan jang harakatlari natijasida bir nafar shveysariyalik halok bo‘lgani haqida ma’lumot berilgan edi, deyiladi xabarda.
Yollanma askarning o‘limi holatlari hamda uning bo‘linmasi joylashgan joy to‘g‘risidagi ma’lumotlar keltirilmagan. Ta’kidlanishicha, mamlakat TIV marhumning qarindoshlari bilan aloqada.
Shveysariyaning amaldagi qonunchiligi mamlakat fuqarolariga xorijdagi jang harakatlarida yollanma askar sifatida ishtirok etishni taqiqlaydi. Mamlakatda bunday askarlarni sud ta’qibi va uch yilgacha ozodlikdan mahrum qilish jazosi kutmoqda.
SRF’ga ko‘ra, Ukrainadagi shveysariyalik yollanma askarlarning umumiy soni noma’lum, biroq mamlakatda xorijdagi harbiy xizmat bo‘yicha 13 ta jinoiy ish tekshirilmoqda.
Bunday holatlar Rossiya frontida ham kuzatilib, avvalroq Moskva tomonida Ukrainaga qarshi jang qilayotgan Shimoliy koreyalik askarlar halok bo‘lgani haqida bir necha bor xabar berilgan edi.
Ukraina armiyasi bunday yo‘qotishlarni bir qator sabablar bilan izohlamoqda. Jumladan, Shimoliy Koreya askarlari “Ikkinchi jahon urushi davridagi kabi” piyoda hujum qilgan va Ukraina dronlari hamda artilleriyasi uchun oson nishon bo‘lgan. Ular odatda nishonga olinsalar ham, hujumni davom ettirgan.
Bundan tashqari, asirga tushmaslik uchun Shimoliy Koreya askarlari o‘zlarini granatalar bilan portlatgan. Shuningdek, KXDR askarlari til bilan bog‘liq muammo tufayli Rossiya qo‘shinlari bilan kontaktga yaxshi kirishmagan. Hatto tasodifan Rossiya pozitsiyalariga hujum qilgan.
Katta yo‘qotishlarga qaramay, Pxenyan yaqin ikki oy ichida Rossiyaga harbiylarning yangi guruhini yuborishi mumkin. Shimoliy Koreya Moskvani qo‘llab-quvvatlash uchun 100 minggacha askar berishga tayyorligini ma’lum qilgani aytilmoqda. Ukraina razvedkasi rahbari Kirill Budanov KXDRdan qo‘shimcha kuch kelishi mumkinligini tasdiqlagan. Ammo Kiyevda Shimoliy Koreyaning ko‘p sonli yangi jangovar qismlari paydo bo‘lishini kutmayotganini aytgan.
Izoh (0)