Ukraina prezidenti Vladimir Zelenskiy o‘z lavozimini ushlab turmasligiga va urush tugab, Ukraina xavfsizligi ta’minlanganida uni tark etishga tayyorligini aytdi. Bu haqda u Germaniyaning ARD telekanalidagi Mayshberger tok-shousida ma’lum qildi.
“Men har qanday narsaga tayyorman, haqiqatan har narsaga. Uzoq va barqaror tinchlik uchun. Inson sifatida, fuqaro sifatida, ota sifatida. Men hech narsaga yopishib olmayman. Men Ukraina prezidentiman, chunki menga 73 foiz odam ovoz bergan va bugun men Ukraina prezidentiman, chunki meni mamlakatimdagi ko‘pchilik qo‘llab-quvvatlamoqda”, dedi u.
Zelenskiy tinchlik shartnomasini imzolash uchun “faqat Zelenskiy ishtirokisiz” talabi qo‘yilsa, lavozimini tark etishga tayyormi, degan savolga shunday javob berdi. Siyosatchining ta’kidlashicha, Rossiya undan urush boshidagidek jismonan emas, balki siyosiy yo‘l bilan qutulmoqchi.
“Buni tushunsa bo‘ladi. Men Putin uchun juda noqulay odamman”, dedi Ukraina rahbari.
Zelenskiy “urush paytida prezident qilishi lozim bo‘lgan ishni” bajrayotganini qayd etdi.
AQSH Ukrainada prezidentlik va parlament saylovlarini 2025-yil oxirigacha o‘tkazishni xohlamoqda, ayniqsa tinchlik kelishuviga erishilsa. Ukrainada navbatdagi prezidentlik saylovi 2024-yil 31-mart kuni o‘tkazilishi kerak edi. Mamlakatdagi harbiy holat tufayli ular o‘tkazilmadi. Ukraina Konstitutsiyasi harbiy holat paytida prezidentlik saylovlarini o‘tkazishni to‘g‘ridan to‘g‘ri taqiqlamaydi. Biroq bunday taqiq “Harbiy holatning huquqiy rejimi to‘g‘risida”gi qonun darajasida belgilangan.
Rossiya prezidenti Vladimir Putin bir necha bor muzokaralar “qonuniyligini yo‘qotgan” Ukraina davlat rahbari bilan o‘tkazilmasligini da’vo qilgandi. Chunki Putinning fikricha, Zelenskiy “noqonuniyligi tufayli hech narsa imzolashga haqli emas”.
AQSH saylov o‘tkazishga chaqirdi, Ukraina javob qaytardi
AQSH maxsus vakili Kit Kelloggan Ukrainada 2025-yil oxirigacha parlament va prezidentlik saylovlarini o‘tkazishga chaqirgandi. Ukraina prezidentining kommunikatsiyalar bo‘yicha maslahatchisi Dmitriy Litvin buni rad etdi. U bu yo‘l bilan Putinni qo‘rqitib bo‘lmasligini ta’kidladi.
Rejasi faqat o‘t ochishni to‘xtatish va saylov bo‘lsa, bu muvaffaqiyatsiz reja — Putinni faqat shu ikki narsa bilan qo‘rqitib bo‘lmaydi, dedi u.
Litvinning so‘zlariga ko‘ra, Moskva “raketa va o‘q-dorilar ishlab chiqarishni ko‘paytirishda, sanksiyalarni chetlab o‘tishning yangi usullarini topishda va neftdan pul ishlashda davom etmoqda.
Shubhasiz, bu qurollarning barchasi demokratik qo‘shnilarni hurmat qilish uchun yaratilmagan. Rossiyaning Shimoliy Koreya bilan harbiy ittifoqi o‘t ochishni to‘xtatishni hurmat qilishi bilan bog‘liq emas. Shuning uchun biz, albatta, asosiy hamkorlarning rasmiy vakillari tomonidan chuqurroq yondashuvni ko‘rishni afzal ko‘ramiz, dedi Zelenskiyni maslahatchisi.
Izoh (0)