АҚШ ҳарбий-денгиз кучларининг “Карл Винсон” авиаташувчиси ва унинг зарбдор гуруҳи Жанубий Кореянинг Пусан портига етиб келди. Бунга жавобан Шимолий Корея етакчисининг синглиси Ким Ё Чжон АҚШга таҳдид қилди.
Ким Ё Чжон бундай “провокациялар”га Шимолий Корея жавоб қайтаришидан огоҳлантирган. Бу, эҳтимол, қурол синовлари бўйича фаолиятни кучайтиришни ва АҚШга нисбатан қарама-қарши позициясини сақлаб қолишни англатади.
Ким Ё Чжоннинг таъкидлашича, яриморолга Американинг атом сув ости кемалари ҳам, бомбардимончи самолётлари ҳам келиб туради. Шунингдек, АҚШ ва Жанубий Корея ўртасида кўплаб ҳарбий машғулотлар, ядровий масалалар бўйича маслаҳат гуруҳи йиғилишлари ташкил этилган.
Корея яриморолидаги вазиятнинг кескинлашувининг асл сабаби, шубҳасиз, АҚШ ва унинг иттифоқчиларининг фитналаридир. Улар НАТО инфратузилмасини бу минтақага кўчириш ва урушга тайёргарлик даражасини оширишга қаратилган ҳаракатларини янада фаоллаштираётгани кўриниб турибди, деди у.
Шимолий Корея раҳбарининг синглиси Пхеньян ядровий урушни жиловлаш воситаларини чексиз кучайтириши учун бир нечта муҳим сабабларга эгалигини айтди.
Биз қўл қовуштириб ўтирмаймиз ва фақат вазиятга изоҳ берамиз. Агар АҚШ ҳарбий кучларни намойиш қилиш бўйича рекордни янгилашда давом этса, унда биз ҳам стратегик тийиб туриш кучларини қўллаш бўйича рекордни янгилашимизга тўғри келади, дея хулоса қилди у.
Ким Ё Чжон Шимолий Кореянинг ўз суверенитетини ҳимоя қилиш иродаси ва қобилиятини текшириш “жуда хавфли” эканини қўшимча қилди.
Жанубий Корея бунга жавобан КХДР расмийларини ўз ҳаракатлари учун “бепарволик билан айбни Сеулга юклашда” айблади. Мудофаа вазирлиги мамлакатлар Пхеньян шу йўл билан ўзининг “ҳарбий провокацияларини” оқлашга уринаётганини таъкидлади.
Изоҳ (0)