Isroil 5-fevral kuni BMTning Inson huquqlari bo‘yicha kengashidan chiqdi. Mamlakat tashqi ishlar vaziri Gideon Saar bu haqda ma’lum qildi.
“(Kengash) an’anaviy tarzda inson huquqlarini buzuvchilarni himoya qilib, ularga e’tibordan chetda qolishga imkon bergan va buning o‘rniga Yaqin Sharqdagi yagona demokratiya — Isroilni shafqatsizlarcha qoralashga harakat qilgan”, deya da’vo qildi Gideon Saar.
U mazkur “organ inson huquqlarini targ‘ib qilish o‘rniga demokratik mamlakatga hujum qilish va antisemitizmni yoyishga e’tibor qaratgani”ni ta’kidladi.
“Bizga nisbatan diskriminatsiya aniq ko‘rinib turibdi: BMT Inson huquqlari kengashida Isroil kun tartibidagi band faqat unga bag‘ishlangan yagona davlatdir”, dedi vazir.
U kengash Isroilni qoralovchi 100 dan ortiq rezolyutsiya qabul qilgani, bu umumiy rezolyutsiyalarning 20 foizidan ko‘prog‘ini tashkil etishi bildirdi. Tashqi ishlar vaziri bu Eron, Kuba, Shimoliy Koreya va Venesuelaga qarshi qabul qilingan rezolyutsiyalardan ham ko‘pligini ta’kidladi.
BMT Inson huquqlari bo‘yicha kengash: Isroil o‘zi a’zo bo‘lmagan kengashdan chiqa olmaydi
Isroil BMTning Inson huquqlari bo‘yicha kengashi tarkibidan chiqa olmaydi, chunki u organning 47 a’zosidan biri emas. Bu haqda BMT organi rasmiy vakili Paskal Sim ma’lum qildi. U Isroil kuzatuvchi maqomiga egaligi, bu esa a’zolikka teng emasligini ta’kidladi.
“Kengashdagi kuzatuvchi davlat o‘zi a’zo bo‘lmagan organ tarkibidan chiqishi mumkin emas”, deb tushuntirdi Sim.
Organ vakilining qo‘shimcha qilishicha, Kengash BMTga a’zo har bir davlatning “Kengash a’zosi yoki kuzatuvchisi bo‘lishidan qat’i nazar” organ ishida ishtirok etishini “olqishlaydi va rag‘batlantiradi”.
AQSH ham Inson huquqlari kengashidan chiqdi
AQSH prezidenti Donald Tramp 5-fevral kuni o‘z mamlakatini BMT Inson huquqlari kengashidan chiqargandi. Saar Isroil nomidan bu qarorni ma’qullagan va uning mamlakati kamsitishlarga “boshqa chiday olmasligini” qayd etgan.
“Men har doim BMTning ulkan salohiyati borligini his qilganman. Ammo hozir u yaxshi boshqarilmayapti va o‘z ishini bajarmayapti”, degan Tramp AQSHning tashkilotlardan chiqishi to‘g‘risidagi farmonni imzolash chog‘ida.
Tramp Isroil bosh vaziri Binyamin Netanyaxu bilan uchrashgan kuni mamlakatning BMT Inson huquqlari kengashidan chiqishi to‘g‘risidagi farmonni imzoladi. Xuddi shu farmon bilan Tramp Falastinlik qochqinlarga yordam ko‘rsatish agentligi (UNRWA)dan chiqdi.
Izoh (0)