Shimoliy Koreya yetakchisi Kim Chen In har qanday urushga tayyor zamonaviy armiyani yaratishga chaqirdi, deb xabar bermoqda News1.

Bu haqda KXDR yetakchisi Kan Kon harbiy akademiyasiga tashrifi chog‘ida aytib o‘tgan. Xususan, u o‘quvchilarga zamonaviy urush olib borishga muvofiq amaliy tajriba va “qo‘mondonlik ko‘nikmalari”ni egallashni topshirdi.
Reuters yozishicha, Shimoliy Koreya yetakchisining safari mamlakat Ukrainadagi harbiy operatsiyada Rossiyani qo‘llab-quvvatlash uchun minglab harbiylarni yuborganidan keyin bo‘lib o‘tgan.
Janubiy Koreya razvedka xizmati siyosatchining harbiy bo‘linmalar va mashg‘ulotlar bo‘yicha avvalgi tekshiruvlari Rossiyaga qo‘shimcha askarlar yuborishga tayyorgarlikning bir qismi bo‘lishi mumkinligini taxmin qildi, deya ta’kidlaydi agentlik.
News1 ga ko‘ra, jangovar harakatlarda ishtirok etayotgan Shimoliy Koreya qo‘shinlari dronlardan foydalanish kabi zamonaviy urush usullariga nisbatan zaif bo‘lib chiqdi. Nashrning qayd etishicha, Kim Chen In yaqinda Rossiyaga yuborilgan va Ukrainada asirga olingan askarlar “Janubiy Koreyaga qochib o‘tmoqchi” ekanligi haqidagi xabarlardan so‘ng harbiy maktablarni birma-bir tekshirmoqda.
Rossiya va KXDR 2024-yilda Keng qamrovli strategik sheriklik to‘g‘risidagi shartnomani imzolagan edi. Ushbu hujjatning 4-moddasida “Agar tomonlardan biri bir yoki bir necha davlatning qurolli hujumi tufayli urush holatiga tushib qolsa, boshqa tomon BMT Nizomining 51-moddasi hamda KXDR va Rossiya qonunlariga muvofiq unga zudlik bilan o‘z ixtiyoridagi barcha vositalar bilan harbiy yordam ko‘rsatishi” belgilangan.
Kiyev ma’lumotlariga ko‘ra, KXDR Rossiyaga 12 mingga yaqin askar yuborgan, ularning aksariyati Kursk viloyatiga yo‘naltirilgan. Kreml Shimoliy Koreya qo‘shinlarining ko‘chirilishi va harakatlanishi haqidagi ma’lumotlarga izoh bermagan.
2024-yilning 1-noyabr kuni KXDR TIV rahbari Soy Son Xi Pxenyan Rossiya armiyasiga yordam ko‘rsatishini rasman e’lon qildi, biroq bu yordam nimalardan iborat ekaniga aniqlik kiritmadi.
20-noyabr kuni The Wall Street Journal Ukraina va Janubiy Koreya rasmiylariga tayanib, Shimoliy Koreya Rossiyaga mamlakatning o‘n nafar eng yuqori martabali amaldorlaridan biri — 500 nafar zobitlar qatorida general-polkovnik Kim Yon Bokni yuborgani haqida xabar bergan edi.
Izoh (0)