Shimoliy Koreya AQSH va Janubiy Koreya o‘rtasidagi harbiy hamkorlikka qarshi turish uchun “strategik vositalar”dan foydalanish bilan tahdid qilib, yadroviy kuchlarni ko‘paytirish bo‘yicha sa’y-harakatlarini ikki baravar oshirdi. Bu haqda Newsweek xabar bermoqda.
Nashrning qayd etishicha, Pxenyan cheklangan miqdordagi qit’alararo ballistik raketalarga ega bo‘lib, ular butun Shimoliy Amerika bo‘ylab nishonlarga zarba berishga qodir deb hisoblanadi. AQSH harbiy-havo kuchlarining yuqori martabali vakili ushbu turdagi har qanday hujum noxush oqibatlarga olib kelishi haqida ogohlantirgan.
Shimoliy Koreya Mudofaa vazirligi axborot boshqarmasi bayonotiga ko‘ra, AQSH prezidenti Donald Tramp ma’muriyati allaqachon “KXDR xavfsizligiga tahdid soluvchi AQSH provokatsiyalarini faollashtirgan”.
Xabarda ta’kidlanishicha, yadroviy tiyib turishga asoslangan KXDR qurolli kuchlarining jangovar qobiliyatini oshirish “AQSH va boshqa dushmanlarning strategik tahdidiga strategik vositalar bilan qarshi turish” uchun adolatli hamda muqarrar variantdir.
Fevral oyi boshida Yaponiyaning NHK teleradiokompaniyasi Shimoliy Koreya joriy yilda Rossiya bilan hamkorlikda ishlab chiqilgan dronlarni yaratishni rejalashtirayotgani haqida xabar bergan edi.
Nashr suhbatdoshlarining aytishicha, mamlakatlar kelishuvga erishgan, unga ko‘ra, KXDR ommaviy ishlab chiqarish uchun bir necha turdagi dronlarni yaratish maqsadida Rossiyadan texnik yordam oladi.
Shuningdek, manbalarning ta’kidlashicha, kelishuv Shimoliy Koreya askarlarini Ukrainaga qarshi hujumlarida Rossiyaga yordam berish maqsadida yuborish evaziga tuzilgan. Shu bilan birga, suhbatdoshlar Rossiya KXDRga yadro qurolini ishlab chiqishda yordam berishni istamasligini qayd etgan.
Rossiya va KXDR hamkorligi
Rossiya va Shimoliy Koreya urush boshlanganidan keyin harbiy sohadagi hamkorlikni kuchaytira boshladi. 2024-yil iyun oyida Rossiya prezidenti Vladimir Putin Shimoliy Koreyaga tashrif buyurib, Kim Chen In bilan hujum sodir bo‘lgan taqdirda bir-birini qo‘llab-quvvatlashni nazarda tutuvchi, shuningdek, G‘arb sanksiyalariga qarshi hamkorlikni o‘z ichiga olgan keng qamrovli strategik shartnoma imzolagandi.
Ukraina armiyasi Kursk viloyatida shimoliy koreyalik ikki askarni asirga olgan. Prezident Vladimir Zelenskiy 12-yanvar kuni ular so‘roqqa tutilgani aks etgan videoni e’lon qildi. So‘roq paytida KXDR askarlari qayerdaligini bilmasligi, ularga bu faqat o‘quv mashg‘uloti deb aytilganini ta’kidlagan.
Izoh (0)