AQSH tadqiqotchilari sun’iy yo‘ldosh tasvirlari asosida Shimoliy Koreya ballistik raketalar ishlab chiqarish zavodlarini kengaytirayotganini aniqladi. Rossiya bu raketalardan Ukrainaga qarshi urushda foydalanmoqda, deb yozdi Reuters.
“11-fevral” zavodi nomi bilan tanilgan obyekt KXDRning sharqiy sohilidagi Xamxun shahrida joylashgan Ryongsong mashinasozlik majmuasiga tegishli. U G‘arbda “KN-23” deb nomlanadigan “Xvason-11” toifasidagi qattiq yonilg‘ili ballistik raketalar ishlab chiqaruvchisidir.
-oPjWu9ok.jpg)
Oktyabr oyida Planet Labs tomonidan olingan zavod hududining sun’iy yo‘ldosh tasvirlarini amerikalik tadqiqotchilar o‘rganib chiqdi. Yangi suratlar qo‘shimcha yig‘uv korpusi va ishchilar uchun turar joy binosi qurilayotganini ko‘rsatmoqda. Majmuaning yerosti inshootlariga kirish joylari ham yangilanmoqda.
Tadqiqotchi Sem Leyrga ko‘ra, yangi yig‘ish korpusi oldingi binodan 60-70 foiz kattaroq, bu esa zavodning ishlab chiqarish quvvatini sezilarli darajada oshiradi. Ilgari ko‘prik krani bilan to‘silgan tunnellarga kirish cheklovlari olib tashlangan.
Biz buni ular zavod unumdorligini sezilarli darajada oshirayotgani yoki oshirishga urinayotgani sifatida ko‘rib chiqyapmiz, dedi Leyr.
Yana bir ilmiy xodim Maykl Duytsman sun’iy yo‘ldosh tasvirlaridagi yangi inshoot omborxona bo‘lishi mumkinligini aytdi. Biroq tadqiqotchi bu yangi raketa yig‘ish liniyasi ekanini istisno etmagan.
Sun’iy yo‘ldosh tasvirlarini qayta ishlash bilan shug‘ullanuvchi SI Analytics kompaniyasining janubiy koreyalik tadqiqotchilari ham zavod hududida yangi qurilish ishlari olib borilayotganini tasdiqlagan.
KXDR Rossiyaga harbiylar borasida yordam bermoqda
Oktyabr oyida Ukraina prezidenti Vladimir Zelenskiy Shimoliy Koreya o‘z askarlarini Rossiyaga yordam berish uchun yuborganini aytgandi. Keyinchalik bu ma’lumotni Janubiy Koreya razvedkasi va Pentagon tasdiqlagan. Janubiy Koreya razvedkasi Moskva Pxenyanga har bir harbiy xizmatchi uchun ikki ming dollar to‘layotgani, bu oddiy KXDR fuqarosining 83 yillik maoshiga teng ekanini ma’lum qilgan.
Noyabr oyida AQSH davlat departamenti Rossiyaga yordam berish uchun yuborilgan shimoliy koreyalik askarlarning aksariyati allaqachon Kursk viloyatidagi janglarda qatnashayotganini aytgan. Zelenskiy ular sezilarli yo‘qotishlarga uchrayotganini ma’lum qilgan.
Izoh (0)