Shimoliy Koreya Rossiyaning Ukrainaga qarshi urushini qo‘llab-quvvatlash uchun qo‘shimcha harbiylar yubordi. Bu haqda Janubiy Koreya razvedkasiga tayanib, Yonhap xabar berdi.
Razvedka ma’lumotlariga ko‘ra, Shimoliy Koreya yanvar va fevral oylarida Rossiyaga 1000 dan ortiq harbiy xizmatchini jo‘natgan. Bu Ukraina armiyasiga qarshi kurashish uchun allaqachon joylashtirilgan 11 mingga yaqin harbiyga qo‘shimcha bo‘lgan.
Taxminan bir oy davom etgan sukunatdan so‘ng, Shimoliy Koreya qo‘shinlari fevral oyining birinchi haftasidan boshlab Kurskning oldingi chizig‘iga joylashtirildi, dedi Milliy razvedka xizmati.
Bundan tashqari, razvedka vakili Shimoliy Koreya Rossiyaga yana qo‘shimcha qo‘shin yuborishga tayyorgarlik ko‘rayotganini ma’lum qilgan. Rossiyaga yuborilgan KXDR askarlari yanvar oyining o‘rtalaridan beri Kursk viloyatidagi janglarda ishtirok etmayapti. Buning sababi, ehtimol, ular orasidagi yo‘qotishlar sonining ko‘pligidadir.
Razvedka hisob-kitoblariga ko‘ra, 300 ga yaqin askar halok bo‘lgan va 2700 ga yaqini yaralangan.
Rossiya va KXDR hamkorligi
Rossiya va Shimoliy Koreya urush boshlanganidan keyin harbiy sohadagi hamkorlikni kuchaytira boshladi. 2024-yil iyun oyida Rossiya prezidenti Vladimir Putin Shimoliy Koreyaga tashrif buyurib, Kim Chen In bilan hujum sodir bo‘lgan taqdirda bir-birini qo‘llab-quvvatlashni nazarda tutuvchi, shuningdek, G‘arb sanksiyalariga qarshi hamkorlikni o‘z ichiga olgan keng qamrovli strategik shartnoma imzoladi.
Ukraina armiyasi Kursk viloyatida shimoliy koreyalik ikki askarni asirga oldi. Prezident Vladimir Zelenskiy 12-yanvar kuni ular so‘roqqa tutilgani aks etgan videoni e’lon qildi. So‘roq paytida KXDR askarlari qayerdaligini bilmasligi, ularga bu faqat o‘quv mashg‘uloti deb aytilganini ta’kidladi.
Ukraina armiyasi bunday yo‘qotishlarni bir qator sabablar bilan izohlamoqda. Jumladan, Shimoliy Koreya askarlari “Ikkinchi jahon urushi” davridagi kabi piyoda hujum qilgan va Ukraina dronlari hamda artilleriyasi uchun oson nishon bo‘lgan. Ular odatda nishonga olinsalar ham, hujumni davom ettirgan.
Bundan tashqari, asirga tushmaslik uchun Shimoliy Koreya askarlari o‘zlarini granatalar bilan portlatgan. Shuningdek, KXDR askarlari til bilan bog‘liq muammo tufayli Rossiya qo‘shinlari bilan kontaktga yaxshi kirishmagan. Hatto tasodifan Rossiya pozitsiyalariga hujum qilgan. Shimoliy Koreya Moskvani qo‘llab-quvvatlash uchun 100 minggacha askar berishga tayyorligini ma’lum qilgani aytilmoqda.
Izoh (0)