Rossiya mudofaa vaziri Andrey Belousovning Pxenyanga tashrifi chog‘ida Shimoliy Koreya yetakchisi Kim Chen In uni Ukrainaga qarshi urushda so‘zsiz qo‘llab-quvvatlashiga ishontirdi.
Rossiyalik vazir bilan 29-noyabr kuni bo‘lib o‘tgan uchrashuvda u Rossiyaning Ukrainaga raketa zarbalarini “o‘zini himoya qilish harakati” deb atadi.
Kimning talqiniga ko‘ra, qo‘shni davlatga hujum qilgan rus qo‘shinlari “Rossiya suvereniteti va hududiy yaxlitligini gegemon imperialistik ambitsiyalardan himoya qilish” bilan shug‘ullanmoqda.
KXDR yetakchisi urushning borishida aybni G‘arbga yukladi
Kimning ta’kidlashicha, G‘arb AQSH boshchiligida Ukrainaga bosim o‘tkazgan va uni uzoq masofali qurollari bilan Rossiya hududiga hujum qilishga “majbur qilgan”. Uning so‘zlariga ko‘ra, Ukrainaning Rossiyaga qarshi G‘arb raketalari yordamida amalga oshirayotgan hujumlari G‘arbning mojaroda “to‘g‘ridan-to‘g‘ri harbiy ishtiroki” bilan barobar.
Belousov, o‘z navbatida, Shimoliy Koreyaning “mutlaqo mustaqil tashqi siyosatini” olqishladi.
Rossiya mudofaa vaziri Kim Chen In bilan uchrashuv oldidan shimoliy koreyalik hamkasbi No Kvan Chxol bilan muzokaralar o‘tkazdi, ular harbiy hamkorlikni yanada faollashtirish masalalarini muhokama qildilar.
Noyabr oyi o‘rtalarida AQSH prezidenti Jo Bayden maʼmuriyati Ukrainaga Vashingtondan olingan uzoq masofali qurollar bilan Rossiya hududiga chuqur hujum qilishga ruxsat bergan edi.
KXDRdan Ukrainadagi urushga yuborilgan askarlar
Janubiy Koreya va AQSHning hisob-kitoblariga ko‘ra, Shimoliy Koreya Rossiyaga 10 mingdan ortiq askar yuborgan. Ulardan ba’zilari allaqachon Kursk viloyatidagi janglarda qatnashgan deb taxmin qilinmoqda. Ukraina prezidenti Vladimir Zelenskiy urushga yuborilgan Shimoliy Koreya askarlari soni 100 mingga yetishi mumkinligi haqida ogohlantirgan. Seul ma’lumotlariga ko‘ra, KXDR Rossiyaga og‘ir artilleriya – o‘ziyurar gaubitsalar va ko‘plab raketa tizimlarini ham yetkazib beradi.
Rossiya va Shimoliy Koreya Rossiyaning Ukrainaga hujumi boshlanganidan keyin harbiy sohadagi hamkorlikni kuchaytira boshladi. 2024-yil iyun oyida Rossiya prezidenti Vladimir Putin Shimoliy Koreyaga tashrif buyurib, Kim Chen In bilan hujum sodir bo‘lgan taqdirda bir-birini qo‘llab-quvvatlashni nazarda tutuvchi, shuningdek, G‘arb sanksiyalariga qarshi hamkorlikni o‘z ichiga olgan keng qamrovli strategik shartnoma imzolagan edi.
Izoh (0)