Rossiya 2024-yil martidan beri Shimoliy Koreyaga 1 million barreldan ortiq neft jo‘natdi. Bu haqda Open Source Centre (OSC) tadqiqot markazining sun’iy yo‘ldosh suratlari asosidagi hisob-kitoblariga tayanib, BBC xabar berdi.
Tahlilchilarga ko‘ra, so‘nggi sakkiz oy ichida Shimoliy Koreyaning o‘ndan ortiq tankerlari Uzoq Sharqdagi Rossiya neft terminali va Shimoliy Koreya portlari o‘rtasida 43 marta qatnovni amalga oshirgan. Sun’iy yo‘ldoshdan olingan suratlarga ko‘ra, ushbu tankerlar Rossiyaga bo‘sh ketgan va yuklangan holda qaytib kelgan.
OSC tomonidan hujjatlashtirilgan birinchi qatnov Shimoliy Koreya o‘q-dorilari Rossiyaga jo‘natilgani haqidagi birinchi xabarlardan yetti oy o‘tib, 7-mart kuni amalga oshirilgan. Oxirgi qatnov 5-noyabr kuni qayd etilgan, o‘shanda Shimoliy Koreya qo‘shinlarining Kursk viloyatiga jo‘natilgani haqida ma’lum bo‘lgan edi.
KXDR barqarorligining oshishi
“Bu doimiy neft oqimi Shimoliy Koreyaga sanksiyalar joriy etilganidan beri kuzatilmagan barqarorlik darajasini bermoqda”, dedi Ochiq manbalar markazining katta tahlilchisi Jo Byorn.
Yadro qurolini ishlab chiqqani uchun KXDRga nisbatan xalqaro sanksiyalar joriy etilgan. Mamlakatga yiliga 500 ming barreldan ortiq neft sotib olish taqiqlangan.
Avvalroq Britaniyaning The Times gazetasi Shimoliy Koreya Rossiyaga yiliga 3 millionga yaqin snaryad yetkazib berishini, bu Rossiya armiyasi Ukrainaga qarshi urushda ishlatadigan o‘q-dorilarning yarmini tashkil etishi haqida xabar bergan edi.
Rossiyadagi Shimoliy Koreya askarlari
Oktyabr oyida Ukraina prezidenti Vladimir Zelenskiy Shimoliy Koreya o‘z askarlarini Rossiyaga yordam berish uchun yuborganini aytgan edi. Keyinchalik bu ma’lumotni Janubiy Koreya razvedkasi va Pentagon tasdiqlagan. Janubiy Koreya razvedkasi Moskva Pxenyanga har bir harbiy xizmatchi uchun ikki ming dollar to‘layotgani, bu oddiy KXDR fuqarosining 83 yillik maoshiga teng ekanligini ma’lum qilgan.
Noyabr oyida AQSH davlat departamenti Rossiyaga yordam berish uchun yuborilgan shimoliy koreyalik askarlarning aksariyati allaqachon Kursk viloyatidagi janglarda qatnashayotganini aytgan.
Iyun oyida Rossiya prezidenti Vladimir Putin Shimoliy Koreyaga tashrif buyurib, Kim Chen In bilan keng qamrovli strategik sheriklik shartnomasini imzolagan edi. Ushbu bitimga ko‘ra, tomonlardan biriga hujum qilingan taqdirda ikkinchisi barcha mavjud vositalar bilan harbiy yordam ko‘rsatish majburiyatini oladi.
Izoh (0)