Qozog‘istonlik tadbirkorlar O‘zbekistonda qo‘shilgan qiymat solig‘i va foyda solig‘i stavkalari 2028-yil 1-yanvargacha oshmasligi sababli bizneslarini qo‘shni mamlakatga ko‘chirmoqchi. Bu haqda “Airan.kz” xabar berdi.
Nashr jurnalistiga ko‘ra, Qozog‘istonda soliqlarni qanchalik oshirish kerakligi haqida bahs ketayotgan bir paytda, qo‘shni O‘zbekistonda, aksincha, QQS va korporativ soliq stavkalarini oshirishga uch yilga moratoriy joriy etildi. Qozog‘istonlik iqtisodchi Rahim Ushakpayev bunga quyidagicha munosabat bildirmoqda:
Bir tadbirkor Qozog‘istonda QQS bo‘yicha kutilayotgan keskin soliq o‘zgarishlari tufayli uning omborxona, metallga ishlov berish, mineral o‘g‘it va to‘qimachilik sohalaridagi unga tanish bo‘lgan besh nafar tadbirkor O‘zbekistonga ko‘chish jarayonini boshlab yuborgan. Aynan shu tarzda Qozog‘iston mintaqadagi investitsiyalar va tadbirkorlik faoliyati uchun raqobatda mag‘lubiyatga uchrashga mahkum, dedi u.
O‘zbekistonda 2028-yilga qadar QQS va foyda solig‘i stavkalari oshirilmaydi
Prezident Shavkat Mirziyoyevning 2024-yil 27-dekabrdagi “Tadbirkorlar uchun teng sharoitlar va adolatli raqobat muhitini ta’minlash bo‘yicha navbatdagi chora-tadbirlar to‘g‘risida”gi farmoni qabul qilindi. Unda 2028-yilga qadar qo‘shilgan qiymat solig‘i va foyda solig‘i stavkalari oshirilmasligi belgilangan.
- Shuningdek, 2025-yil 1-yanvardan 2028-yil 1-yanvarga qadar tikuv-trikotaj, poyabzal va charm-attorlik sanoati yo‘nalishlarida ishlab chiqarish faoliyatini yuritayotgan tadbirkorlik subyektlari uchun foyda solig‘i va o‘zlarining xodimlari uchun jismoniy shaxslardan olinadigan daromad solig‘i stavkalari 1 foiz etib belgilandi.
- 2025-yil 1-apreldan boshlab daromadidan qat’i nazar, farmatsevtika mahsulotlari savdosi bilan shug‘ullanuvchi yoki tibbiy xizmat ko‘rsatuvchi yuridik shaxslar qo‘shilgan qiymat solig‘ini to‘lovchilar deb e’tirof etiladi.
- Tiklanish va taraqqiyot jamg‘armasi 2025-yilda aylanma mablag‘larini to‘ldirishga ajratiladigan kreditlar uchun “Savdoni rivojlantirish kompaniyasiga” 2 foiz stavkada 100 million dollar qo‘shimcha mablag‘ ajratadi. Mablag‘lar 5 yil muddatga, 2028-yil 1-yanvardan qaytarilishi kerak.
- 2025-yil 1-yanvardan O‘zbekiston bojxona chegarasidan olib chiqiladigan har bir kilogramm paxta ip-kalavasi uchun yig‘im uning eksport narxidan 2 foiz miqdorda, biroq 0,05 dollardan ko‘p bo‘lmagan miqdorda o‘rnatiladi.
Izoh (0)