Qozog‘istonning Uralks shahrida ichida odamlar bo‘lgan avtomobil muzlagan Chagan daryosiga tushib ketdi. Bu haqda Zakon.kz xabar berdi.
Hodisa 2-fevral kuni kechqurun Samal mikrorayoni yaqinida ro‘y bergan. Cho‘kib ketgan avtomashinadan zo‘ravonlik alomatisiz ikki nafar erkakning jasadi topilgan.
“Tafsilotlarga aniqlik kiritilmoqda. Jasadlar ekspertiza uchun yuborilgan”, deya xabar berdi politsiya.
Qurbonlarning jasadlarini g‘ovvoslar olib chiqqan, mashina esa hali ham olib chiqilmagan. Qozog‘iston Favqulodda vaziyatlar departamenti suv havzalarida xavfsizlik choralariga rioya qilishga chaqirgan.
Ob-havo sharoiti tufayli viloyatdagi suv havzalarida muz qalinligi o‘rtacha 10-15 santimetrdan kam, ba’zi joylarda esa atigi 5 santimetrni tashkil etadi, deyiladi xabarda.
Bu qo‘shni respublikada odamlar bo‘lgan avtomobilning daryoga qulashiga oid birinchi holat emas. 5-yanvar kuni Abay viloyati Irtish daryosiga ikki yo‘lovchi avtomobili tushib ketgandi. YTH vaqtida salon ichida 4 kishi bo‘lgan. Yo‘lovchilardan biri mashinadan o‘zi chiqib, qirg‘oqqacha suzib borgan. U tibbiy yordamga muhtoj bo‘lmagan.
O‘shanda qutqaruv operatsiyasiga 55 nafar qutqaruvchi, 5 ta suzish vositasi, 2 ta dron, suvosti qidiruvlari uchun exolot, 10 ta texnika jalb qilingandi.
Izoh (0)