Xitoy rahbari Si Szinpin tashqi siyosat haqidagi o‘z nutqlarida Markaziy Osiyo davlatlarini qanchalik ko‘p tilga oladi?
Linkedin ijtimoiy tarmog‘idagi Nightingale Intelligence akkaunti Olmaotadagi “Bir kamar, bir yo‘l ekspertlar klubi” tomonidan 2024-yilda chop etilgan Si Szinpinning Xitoy tashqi siyosatiga bag‘ishlangan maqola va nutqlari to‘plamini tahlil qildi.
Unga ko‘ra, Si Szinpin Markaziy Osiyo mamlakatlari ichida Qozog‘istonni eng ko‘p tilga olgan. Bu nafaqat mamlakatning strategik ahamiyati, balki Si Szinpin tashabbusi bilan boshlangan “Ipak yo‘li iqtisodiy kamari” kabi yirik loyihalarni amalga oshirishdagi roli bilan izohlanadi. 2013—2023-yillarda Qozog‘iston ushbu tashabbusni amalga oshirishda markaziy davlatga aylandi va Xitoy rahbari bu mamlakatga to‘rt marta tashrif buyurdi.
“2023-yilga kelib Markaziy Osiyoning boshqa davlatlari, xususan, O‘zbekiston nomini tilga olishning ko‘payishi Xitoy—Qirg‘iziston—O‘zbekiston temiryo‘li bo‘yicha muhokamalar va ikki tomon o‘rtasidagi hamkorlikni mustahkamlash bilan bog‘liq.
Biroq Markaziy Osiyoning boshqa davlatlari Xitoy—Qirg‘iziston—O‘zbekiston temiryo‘li yoki Xitoy—Tojikiston avtomobil yo‘li kabi maxsus loyihalar kontekstida tilga olingan bo‘lsa-da, Si Szinpinning Qozog‘iston haqidagi nutqlarida hukumatlar va xalqlar o‘rtasidagi aloqalarni chuqurlashtirish kabi kengroq mavzularga eʼtibor qaratiladi”, deyiladi tahlilda.
Si Szinpin 2013—2023-yillardagi o‘z nutqlarida Qozog‘iston nomini 120 marta, O‘zbekiston nomini 22 marta, Qirg‘izistonni 20 marta, Turkmanistonni 16 marta, Tojikistonni esa 7 marta tilga olgan.
“Muhimi, Si Szinpinning bayonotlari mintaqaning madaniy merosi va xilma-xilligini e’tirof etadi. U qozoq va tojik tillarida ijod qilgan shoirlardan iqtibos keltirishi yoki mashhur o‘zbek maqoliga ishora qilishi bunga misol bo‘ladi.
Xitoy va Markaziy Osiyo davlatlari o‘rtasidagi madaniy yaqinlik va o‘zaro hurmatni ta’kidlagan holda, bunday yondashuv kengroq auditoriya bilan maqsadli muloqotda xalq diplomatiyasining ta’sirini kuchaytirishga ham yordam beradi”, deyiladi Nightingale Intelligence tahlilida.
Izoh (0)