Ozarbayjon o‘zining Embraer E190 samolyoti halokati uchun Rossiya bilan sudlashadi, deb xabar bermoqda Azeri-Press. Nashr ma’lumotlariga ko‘ra, hozirda dalillar bazasi shakllantirilib, xalqaro sudga murojaat qilishga tayyorgarlik ko‘rilmoqda.
Ozarbayjonning shartlari va talablari aniq, ular eng yuqori darajada aytib o‘tilgan. Moskva o‘z aybini ochiqchasiga tan olishi va javobgarlikni zimmasiga olishi kerak. Aks holda, Boku keyingi qadamlarga tayyor, deya yozadi agentlik.
Aniqlanishicha, Ozarbayjon hukumati Qozog‘iston Transport vazirligining 25-dekabr kuni Oqtovda Azerbaijan Airlines (AZAL) samolyoti halokatga uchragani haqidagi dastlabki hisoboti e’lon qilinganidan keyin ham Rossiya tomonining hodisaga noxolis munosabat ko‘rsatishda davom etayotganidan g‘azablangan.
Ularning fikricha, bunga Rosaviatsiyaning “hujjatda voqea sabablari haqida xulosalar yo‘q” mazmunidagi bayonoti guvohlik beradi. Xususan, idora samolyotga qushlar urilgani va bortdagi gaz balloni portlagani haqidagi taxminni dispetcherlarga aynan ekipaj aytganini, Rossiya taklif qilgan Mahachqal’a va Mineralniye Vodi aeroportlariga qaramay, qo‘nish uchun Oqtovga uchishga qaror qilganini ta’kidlagan. Bundan tashqari, Rosaviatsiya Moskva kemaga zarar yetkazgan begona jihozlarni o‘z ekspertizasi uchun olmaganini qayd etgan. Shu bilan birga, idora bayonotida hisobotdagi boshqa muhim tafsilotlar tushirib qoldirilgan. Masalan, Grozniy aeroporti dispetcheri samolyot shikastlanganidan keyingi reja doirasida havo maydoni yopilganini ma’lum qilgan. Shuningdek, Rosaviatsiya hisobotda qush zarbasi va kislorod balloni portlashi alomatlari qayd etilmaganini aytmagan.
APA’ning yozishicha, Ozarbayjon Moskva mas’uliyatni ekipajga yuklab, ishni yumshatmoqchi deb hisoblamoqda.
Hozirda Rossiya rasmiylari AZAL samolyotiga zarba berilganda Checheniston Ukraina dronlari hujumini qaytarganiga urg‘u bermoqda. Biroq Ozarbayjon layner Rossiyaning Pansir-S havo mudofaa tizimidan o‘qqa tutilganini da’vo qilmoqda. Respublika hukumatidagi manbaning Reuters agentligiga ma’lum qilishicha, ular samolyotdan olib chiqilgan va xalqaro ekspertiza davomida aniqlangan tegishli raketa bo‘lagiga ega. Bundan tashqari, Grozniydagi Xonqal’ada joylashgan harbiy qism hududidan ham o‘t ochilgani haqida ma’lumotlar bor.
AZAL aviakompaniyasining Bokudan Grozniyga uchayotgan Embraer E190 samolyoti 25-dekabr kuni Oqtov yaqinida halokatga uchradi. 38 kishi halok bo‘ldi, yana 29 kishi jarohatlandi. Aliyevning ta’kidlashicha, layner radioelektron kurash vositalari yordamida boshqarilmaydigan holatga keltirilgan va keyin Rossiya hududidan hujumga uchragan. Uchuvchilar Rossiyaning eng yaqin aeroportlaridan biriga favqulodda qo‘nishni so‘rashgan, biroq ularga hamma joyda rad javobi berilgan, shundan so‘ng samolyot Kaspiy dengizini kesib o‘tib, Oqtov shahriga qulagan. Aliyev halokat uchun javobgarlikni Rossiyaga yuklab aybdorlarni jazolashni talab qildi. U, shuningdek, Moskvaning samolyotning havo hujumidan mudofaa tizimidan o‘qqa tutilishi faktini qushlar bilan to‘qnashuv va bortdagi gaz balloni portlashi haqidagi “bema’ni taxminlar yordamida yashirish”ga urinishlaridan g‘azablangan.
Izoh (0)