Statistika agentligi tomonidan O‘zbekistonning tashqi savdo statistikasi e’lon qilindi.
Ma’lum qilinishicha, 2025-yil yanvar oyida respublikaning tashqi savdo aylanmasi 4,5 mlrd AQSH dollariga yetdi va 2024-yilning yanvar oyiga nisbatan 297,2 mln AQSH dollariga yoki 7,5 foizga ko‘paydi.
Tashqi savdo aylanmasida eksport hajmi 1 309,8 mln AQSH dollariga (2024- yilning yanvar oyiga nisbatan 14,1 foizga ko‘paydi) va import hajmi 3 199,5 mln AQSH dollariga (4,4 foizga ko‘paydi) yetdi.
Qozog‘iston O‘zbekistonning eng yirik tashqi iqtisodiy hamkorlaridan biriga aylandi (Xitoy va Rossiyadan keyin). Bunga sabab quyidagilar bo‘lishi mumkin: umumiy chegaraning mavjudligi, MDHning erkin savdo hududida savdo qilishi hamda so‘nggi paytlarda o‘zaro iqtisodiy aloqalarning keskin erkinlashtirilishi.
O‘zbekiston jahonning 154 mamlakati bilan savdo aloqalarini amalga oshirib kelmoqda. Tashqi savdo aloqasining nisbatan salmoqli hissasi Xitoyda (22,1 foiz), Rossiyada (17,7 foiz), Qozog‘istonda (7,0 foiz), Turkiyada (4,7 foiz) va Koreya Respublikasida (3,8 foiz) qayd etilgan.
Respublika tashqi savdo aylanmasi tarkibida eng yuqori ulushni Toshkent shahri 41,7 foiz ulush bilan 1 881,4 mln AQSH dollarini, eng quyi ulushni esa Sirdaryo viloyati 1,2 foiz ulush bilan 52,1 mln AQSH dollarini tashkil etdi.
2025-yil yanvar oyida tashqi savdo aylanmasida MDH davlatlarining ulushi 36,5 foizni tashkil etib, tashqi savdo aylanmasidagi ulushi 2024-yilning mos davriga nisbatan 2,4 foizga ko‘paydi. O‘zbekiston bilan savdo qilayotgan mamlakatlar iqtisodiyoti o‘sishi mazkur mamlakatlar iste’molchilari tomonidan respublika eksportiga bo‘lgan talabning oshishiga olib kelishi mumkin.
O‘tgan yili mamlakat iqtisodiy o‘sishi prognozdagi ko‘rsatkichdan yuqori darajada shakllandi.
2024-yilda O‘zbekiston yalpi ichki mahsuloti 1,45 kvadrillion so‘mdan oshdi. Bu miqdor yil davomida Markaziy bank eʼlon qilgan dollar kurslarining o‘rtacha miqdoridan kelib chiqilsa, taxminan 115 mlrd dollarga teng bo‘ladi.
Statistika agentligi maʼlumotlariga ko‘ra, 2024-yil yakunida O‘zbekiston aholisi soni 37 million 543 ming nafardan ortgan. Shunda YIM miqdori aholi jon boshiga kamida 3 ming dollardan to‘g‘ri keladi.
2023-yil noyabrda 2024-yilgi iqtisodiy o‘sish 5,6—5,8 foiz atrofida bo‘lib, 1,3 kvadrillion so‘mga yetishi prognoz qilingandi.
Izoh (0)