Qozog‘iston Ekologiya vazirligi bayram sanalari ro‘yxatiga o‘zgartirishlar kiritish to‘g‘risidagi buyruq loyihasini tayyorladi. Bu haqda Tengrinews xabar berdi.
Hujjatga ko‘ra, bayram sanalari ro‘yxatiga 3-sentyabr Qozoq it zotlari kuni deb kiritish rejalashtirilmoqda. Sabab sifatida tozi va to‘bet it zotlarini saqlash va ko‘paytirish sohasida faoliyat yurituvchi xodimlarning bayrami yo‘qligi tilga olingan.
Tozi va to‘bet — asl qozoq it zotlari bo‘lib, “Yetti xazina”ning bir qismi sifatida qaraladi. Bayram it zotlarining tarixi, xususiyatlari va parvarishiga bag‘ishlangan ma’ruzalar, seminarlar, ko‘rgazmalar va tadbirlar bilan nishonlanishi mumkin. Bu esa aholi orasida umumiy xabardorlik darajasini oshiradi.
Bayramning tasdiqlanishi kinologiya tashkilotlari, qozoq zotlari ishqibozlari uchun tajriba almashish, ko‘rgazma, musobaqa va boshqa tadbirlarda qatnashish imkoniyatlarini kengaytirishi kutilmoqda. Mazkur loyihani amalga oshirish davlat byudjetidan qo‘shimcha mablag‘ sarflanishini talab etmaydi.
Izoh (0)