O‘zbekiston Bosh konsulxonasi xodimlari sa‘y-harakatlari bilan Qozog‘istonga muolaja olish maqsadida borgan uch nafar o‘zbekistonlik fuqaroning shaxsini tasdiqlovchi hujjatlari olib berildi. Bu haqda “Dunyo” axborot agentligi xabar berdi.
O‘zbekistonlik bo‘lgan F.R. va F.A. va S.M. mahalliy ichki ishlar xodimlari tomonidan pasportlari noqonuniy tarzda olib qo‘yilgani bo‘yicha murojaat qilgan. O‘rganishlar davomida shu yil 28-yanvar kuni mahalliy politsiya xodimlari hamyurtlarimiz turgan mehmonxonaga kelib, ularning pasportlarini olib qo‘ygani va Qozog‘istondan chiqarib yuborish bilan tahdid qilgani ma‘lum bo‘ldi.
Olmaota viloyati Ichki ishlar boshqarmasi mutasaddilari bilan olib borilgan muzokaralar natijasida politsiya xodimlarining xatti-harakatlari va talabi noqonuniy bo‘lgani o‘z tasdig‘ini topdi. Chunki 2000-yil 7-iyuldagi O‘zbekiston va Qozog‘iston o‘rtasidagi fuqarolarning o‘zaro sayohatlari to‘g‘risidagi shartnomaga muvofiq O‘zbekiston fuqarolari Qozog‘iston hududida bir oy muddatgacha registratsiyasiz bo‘lishi mumkin.
Ushbu talabdan kelib chiqib, yuqorida keltirilgan fuqarolar Qozog‘iston qonunchiligini buzmagan. Shu bois hech qanday ma‘muriy javobgarliksiz ularning shaxsini tasdiqlovchi hujjatlarining qaytarilishi ta‘minlandi.
Bundan avval AQSHda O‘zbekiston fuqarosi hibsga olingani haqida xabar berilgandi. Shuningdek, Rossiyaning Sankt Peterburg shahri Kirov tumanida o‘zbekistonlik erkak 15 kilogram gashish bilan qo‘lga olingandi.
Bundan tashqari, Rossiyadan 45 nafar o‘zbekistonlik migrant chiqarib yuborilishi ham aytilgandi.
Izoh (0)