Prezidentning JST masalalari bo‘yicha vakili Azizbek O‘runov JST Bosh kengashining yig‘ilishidan olingan xulosalar bilan bo‘lishdi.
Unga ko‘ra, JST aʼzolari 2026-yil 26—29-mart kunlari Kamerunda bo‘lib o‘tadigan MC14 vazirlar konferensiyasida O‘zbekistonni yangi aʼzo sifatida kutib olishga chaqirgan.
“Prezident Shavkat Mirziyoyev O‘zbekistonni JSTga olib kirmoqda. Qo‘shilish jarayoni boshlangan 31-yildan so‘ng tarixiy qadamlar bugunga kelib sezilarli bo‘lib bormoqda.
2025-yil 19-fevralda bo‘lib o‘tgan JST Bosh kengashining 2-kun yig‘ilishidan shunday xulosaga kelish mumkin.
Kun tartibining 11-bandi doirasida JST Bosh direktori 2024-yil yakunlari bo‘yicha aʼzolik holati to‘g‘risidagi hisobotni taqdim etdi. 8-yillik jimjitlikdan so‘ng Abu-Dabidagi MC13 vazirlar konferensiyasi davomida ikki davlat Timor-Leste va Komor orollari JSTga aʼzo bo‘lishdi. Yana 22 davlat JSTga aʼzo bo‘lish jarayoniga yetakchilik qilmoqda.
JST bosh direktori so‘nggi o‘zgarishlar va erishilgan sezilarli yutuqlarni inobatga olib, O‘zbekiston, Bosniya va Gersegovina hamda Efiopiyaning aʼzo bo‘lish masalasiga MC14 vazirlar konferensiyasining bosh maqsadi sifatida eʼtibor qaratishni taklif qildi. Mazkur tadbir 2026-yil 26—29-mart kunlari Kamerunda bo‘lib o‘tadi. JSTning 26 aʼzosi ushbu masala bo‘yicha murojaat qilishgan.
Biz JSTning 16 aʼzosi tomonidan bir ovozdan qo‘llab-quvvatlanganimizdan juda mamnun bo‘ldik, ular JSTga jalb qilingan barcha aʼzolarni jarayonni yakunlash va O‘zbekistonni MC14 konferensiyasi davomida yangi aʼzo sifatida kutib olishga chaqirishdi.
Fursatdan foydalanib, Argentina, Braziliya, Botsvana, Xitoy, Hindiston, Indoneziya, Koreya, Malayziya, Pokiston, Filippin, Janubiy Afrika, Turkiya va Buyuk Britaniyaga, MDH davlatlari – qardosh Qozog‘iston, Qirg‘iziston va Tojikistonga o‘z minnatdorchiligimni bildirmoqchiman.
O‘zbekiston Prezident qo‘llab-quvvatlashi ostida o‘z xalqi oldidagi majburiyatlarni bajarish, xalq hayotini yaxshilash, hamkorlari oldida muvaffaqiyatliroq bo‘lish, Jahon savdo tashkilotiga aʼzo barcha davlatlar kutilmalarini oqlash va dunyoni yanada integratsiyalashgan qilish uchun bu yerda bo‘lib turibdi.
Qaror qabul qilingan, 2026-yilga ham oz qolmoqda...” deb yozdi O‘runov.
Avvalroq Buyuk Britaniya ham O‘zbekistonning Jahon savdo tashkilotiga aʼzo bo‘lish jarayonini to‘liq qo‘llab-quvvatlashini tasdiqlagani xabar qilingandi.
Uchrashuvlarda Britaniya O‘zbekistonni Markaziy Osiyodagi eng muhim sheriklaridan biri sifatida ko‘rishi va Toshkent bilan har tomonlama aloqalarni yanada jadallashtirishdan manfaatdor ekanligi taʼkidlandi.
O‘zbekistoning JSTga a’zo bo‘lish jarayoni qachin boshlangandi?
O‘zbekistonning JSTga a’zo bo‘lishi bo‘yicha jarayon 1994-yil boshlangan. 1998-yilda bu bo‘yicha ishchi guruh tashkil etilgan edi. Keyingi yillarda ushbu ishchi guruh faqat uch marta uchrashdi va 2005-yillarning o‘rtalariga kelib bu borada xalqaro ekspertlar bilan uchrashuvlar to‘xtab qolgandi. O‘zbekistonning JSTga a’zo bo‘lish jarayoni 2020-yil iyul oyida bo‘lib o‘tgan ishchi guruhning to‘rtinchi yig‘ilishi bilan rasman qayta tiklandi. Shundan so‘ng 2022-yil iyun, 2023-yil mart va 2023-yil noyabr oylarida yana uchta uchrashuv bo‘lib o‘tdi.
2023-yil sentyabrida Shavkat Mirziyoyev BMT Bosh assambleyasining 78-sessiyasi doirasida Jahon savdo tashkiloti (JST) bosh direktori Ngozi Okonjo-Iveala bilan uchrashuv o‘tkazgandi. Unda JST bosh direktori O‘zbekiston tomonidan tashkilotga a’zo bo‘lish borasida ko‘rilayotgan choralarni yuqori baholagan. Ngozi Okonjo-Iveala JST kotibiyati O‘zbekistonning sa’y-harakatlarini to‘liq qo‘llab-quvvatlashini aytgan hamda mamlakat yaqin kelajakda tashkilotga qo‘shilishiga ishonch bildirgandi.
2024-yilning 5-iyun kuni O‘zbekistonga tashrif buyurgan Ngozi Okonjo-Iveala JSTga a’zolik qanday imkoniyatlar taqdim etishini aytib o‘tgandi.
JSTga aʼzolik O‘zbekiston korxonalariga yangi bozorlar va imkoniyatlar ochadi. Tarkibiy infratuzilmani yaxshilash va O‘rta koridor bilan bog‘lanish uchun qilingan investitsiyalar O‘zbekistonni dunyo bilan bog‘langan mamlakatlar qatoriga qo‘shadi. Bu logistikada raqobatbardoshroq bo‘lishga yordam beradi. Ishonamanki, biz bunga erishamiz.
Hozirgidek makroiqtisodiy ramkani juda yaxshi boshqarish muhim. Shuningdek, yangi tarmoqlarni, yangi ish o‘rinlarini yaratish va qiymat zanjirini rivojlantirish uchun afzalliklardan foydalanish zarur. Shu tariqa biz yoshlarimiz uchun bo‘sh ish o‘rinlarini yaratishimiz mumkin, — degandi u.
Shuningdek, Ngozi Okonjo-Iveala so‘nggi o‘n yilliklarda JSTga qo‘shilgan mamlakatlarda iqtisodiy o‘sish kuzatilayotganini ta’kidlab, tashkilot aʼzolari dunyo savdosining 98 foizini qamrab olishini ma’lum qilgan.
JSTga aʼzo bo‘lish O‘zbekistonga nima beradi?
“Jahon savdo tashkilotiga aʼzo bo‘lishdan oladigan eng birinchi manfaatimiz—iqtisodiyotda korxonalar uchun teng sharoit yaratilishidir. Bu o‘z navbatida raqobat muhiti yaxshilanishiga olib keladi va bu ikkinchi muhim jihat — raqobat muhiti yaratilishiga olib keladi. Raqobatsiz rivojlanish qiyin. Tez rivojlangan davlatlar tajribasiga qaralsa, ularda iqtisodiy o‘sishning asosiy manbalaridan biri raqobat muhiti bo‘lgan. Uchinchidan, sifatli investitsiyalar keladi. Bu iqtisodiyotning barqaror o‘sishi uchun muhim omil”, degan edi Aziz Urunov tashkilotga a’zolik haqida “Daryo”ga bergan intervyusida.
Uning ta’kidlashicha, O‘zbekiston ushbu tashkilotga qo‘shilish orqali oladigan to‘rtinchi eng muhim foyda — savdo munosabatlarida JST aʼzolari bilan bir tilda gaplashish bo‘ladi. Mamlakat tashqi bozorga ochiladi. Bu O‘zbekistonning nafaqat ichki bozori, balki tashqi bozorlarni ham tadbirkorlarga ochilishiga yordam beradi. Global ishlab chiqarish zanjiriga kirish uchun katta imkoniyat yaratadi.
Prezident yordamchisi Saida Mirziyoyeva 2024-yilda mamlakat JSTga a’zo bo‘lish yo‘nalishda katta qadam tashlaganini ta’kidlagan. Bu prezident Shavkat Mirziyoyev tomonidan olib borilayotgan qat’iy iqtisodiy islohotlar natijasida amalga oshgani e’tirof etilgan.
Xususan, o‘tgan yili JST ishchi guruhi ikkita muhim yig‘ilish o‘tkazdi. Bu a’zolikning asosiy hujjati — ishchi guruh hisoboti loyihasini tayyorlashga kirishishga imkon berdi.
“JSTga a’zolik va davlat rahbari tomonidan olib borilayotgan islohotlarning yakuniy maqsadi, shubhasiz, xalqimiz farovonligini ta’minlash, unga munosib ish o‘rinlarini yaratish va iqtisodiyot boshqaruvini samaraliroq tizimga o‘tkazishdir”, degan edi Saida Mirziyoyeva.
Qisqa vaqt ichida biznesni va raqobatni yanada shaffof qilish uchun 20 ta muhim qonun qabul qilindi. Saida Mirziyoyevaning qayd etishicha, tez orada tashkilotning to‘laqonli a’zosi bo‘lish uchun 2025-yilda ham O‘zbekiston shu sur’atda davom etadi. Bu mamlakatning investitsion jozibadorligini oshirishi hamda o‘zbek biznesining mintaqaviy va global qo‘shilgan qiymat zanjirlariga kirib borishini ta’minlashi lozim.
O‘zbekiston 2026-yilgacha Jahon savdo tashkilotiga aʼzo bo‘lmoqchi. Shavkat Mirziyoyev O‘zbekistonning ushbu tashkilotga a’zo bo‘lishi chuqur o‘ylangan va uzoqni ko‘zlagan tanlov ekanligini ta’kidlagandi.
Izoh (0)