Qozog‘istonning Olmaota viloyatidagi masjidda 9-fevral kuni yong‘in sodir bo‘ldi. Bu haqda “Zakon.kz” xabar berdi.
Viloyat Favqulodda vaziyatlar boshqarmasiga ko‘ra, voqea Qorasaroy tumanidagi Enbekshi qishlog‘ida yuz bergan. Masjidda 50 kvadrat metr maydonda mebel va xo‘jalik jihozlari yonib ketgan.
“Chaqiruv joyiga zudlik bilan Olmaota viloyati FVBning 14 nafar xodimi va to‘rtta texnikasi yuborilgan. Eng yaqin o‘t o‘chirish qismigacha bo‘lgan masofa 22 kilometr edi. Ko‘rilgan tezkor choralar natijasida yong‘in qurshab olingan va 50 kvadrat metr maydonda bartaraf etilgan”, deyiladi xabarda.
Qurbonlar va jarohatlanganlar yo‘q. Yong‘in sababini aniqlash uchun Olmaota viloyati Favqulodda vaziyatlar boshqarmasi tadqiqot-sinov yong‘in laboratoriyasi va tergov bo‘limi xodimlari hodisa joyida ishlashmoqda.
2024-yil noyabr oyida Chimkentdagi masjidda erkak namoz vaqti safdoshini do‘pposlagandi. Erkakka safdoshining baland ovozda duo o‘qiyotgani yoqmagan. Mojaro tufayli imom jamoat namozini to‘xtatishga majbur bo‘lgan. Hodisa ishtirokchilari politsiyaga ariza bilan murojaat qilgan. O‘shanda Qozog‘iston Musulmonlari diniy boshqarmasi fuqarolarni masjid qoidalariga rioya qilishga va toqatli bo‘lishga chaqirdi.
Izoh (0)