Qozog‘iston Transport vazirligi 25-dekabr kuni Oqtov yaqinida halokatga uchragan Azerbaijan Airlines (AZAL) samolyoti halokatini tekshirishning dastlabki natijalarini o‘z ichiga olgan hisobotni e’lon qildi.
Ushbu hisobotda keltirilgan ma’lumotlar dastlabki bo‘lib, barcha materiallarni o‘rganish va tadqiq qilish natijalariga ko‘ra to‘ldirilishi mumkin. Ishlar yakunlangandan so‘ng, aviatsiya hodisasi bo‘yicha tekshiruv natijalari asosida yakuniy hisobot tayyorlanadi, deyiladi hujjatda.
Bundan tashqari, hisobotda ta’kidlanishicha, komissiya havo kemasi tuzilmalarining shikastlanishlarini batafsil tekshirishni davom ettirmoqda.
Ekipajda dastlabki muammolar 05:13:31 da yuzaga kelgan, havo kemasiga zarba berilgan, shundan so‘ng avtopilotning o‘chirilganligini bildiruvchi ovozli signal ishga tushgan.
3-gidravlik tizimida bosim qisqa vaqt ichida keskin tushib ketgan. 3-gidravlik tizimidagi suyuqlik darajasi 0 foizga qadar pasaygan. Boshqaruv rullarining (ELEVATOR, AILERON, RUDDER) holati nol nuqtasida qotib qolgan va parvoz oxirigacha shu holatda saqlangan.
Soat 05:13:56 da ikkinchi zarba qayd etilgan. Komandir ekipaj bilan aloqaga chiqadi:
- Allo, nima bo‘ldi?
- Ikkita o‘rindiq portladi, yaqinlasha olmayapman, chunki yo‘lovchilar o‘rinlaridan turib ketishdi, ularni joylariga o‘tqazyapman
Uchuvchilar ikkinchi zarbani qushlar bilan to‘qnashuv deb o‘ylaydi.
Ekipaj Grozniy bilan muloqot paytida boshqaruvni yo‘qotayotganini ma’lum qiladi. Minvodi, keyin Maxachqal’adan ob-havoni so‘raydi, shundan so‘ng Bokuga qaytishga qaror qiladi.
Soat 05:26:58 da Grozniy bilan muloqot to‘xtatiladi. 05:29:24 da Rostov minorasi bilan aloqa boshlanadi.
Ob-havo yaxshi bo‘lgani uchun 05:42:40 da Oqtovga uchishga qaror qilindi. Soat 06:02:47 da samolyot ekipaji Oqtov aeroporti minorasi bilan bog‘lanib, ilk marta xalqaro ofat signali yuboriladi.
06:22:24 da ekipaj shassini tushirishni boshladi. Undan so‘ng mexanizatsiyani ishga tushirildi, keyin esa ovozli ogohlantirish signali yangradi.
Soat 06:27:58 da samolyotning o‘ngga 35 gradus qiyalik bilan yerga urilgani qayd etildi.
Saqlanib qolgan qismlarning dastlabki ko‘zdan kechirilishi natijasida fyuzelyajning dum qismida, vertikal va gorizontal stabilizatorlarda, balandlik va yo‘nalish rullarida turli o‘lcham va shakldagi ko‘plab teshilgan va teshilmagan shikastlanishlar aniqlandi. Shunga o‘xshash shikastlanishlar havo kemasining chap dvigateli va chap qanotida, shuningdek, havo kemasining agregatlar va qismlarida ham kuzatildi. Ba’zi joylarda shikastlanishlar to‘g‘ri to‘rtburchak shaklga ega.
-f97hJ53g.jpg)
Oqtovdagi samolyot halokati
2024-yil 25-dekabr kuni Oqtov aeroportidan uch kilometr uzoqlikda Ozarbayjonning Azerbaijan Airlines (AZAL) aviakompaniyasiga tegishli Embraer samolyoti bilan aviahalokat yuz berdi. Boku—Grozniy reysida parvoz qilayotgan samolyot favqulodda qo‘nishga urinish paytida halokatga uchradi. Samolyot bortida 62 yo‘lovchi va 5 nafar ekipaj a’zosi bo‘lgan.
Tergov va taxminlar
Halokatni IKAO (Xalqaro fuqaro aviatsiyasi tashkiloti) konvensiyasiga muvofiq tergov qilishga Qozog‘iston rahbarlik qilmoqda. Tekshiruv ishlarida Ozarbayjon, Rossiya mutaxassislari, xalqaro ekspertlar va Embraer vakillari ishtirok etmoqda. Qora qutilar olinib, xalqaro ekspertlar ishtirokida rasshifrovka qilinmoqda.
Ozarbayjon ommaviy axborot vositalari, shuningdek Euronews va Reuters halokat sabablaridan biri sifatida Rossiya havo hujumidan mudofaa vositalarining ishlashi haqidagi taxminni muhokama qiluvchi materiallarni e’lon qildi.
28-dekabr kuni Rossiya prezidenti Vladimir Putin Rossiya havo hududida fojiali hodisa sodir bo‘lgani munosabati bilan uzr so‘radi va halok bo‘lganlarning oilalariga yana bir bor hamdardlik bildirib, jarohat olganlarning tezroq sog‘ayib ketishini tiladi.
29-dekabr kuni Ozarbayjon prezidenti Ilhom Aliyev Ozarbayjon fuqaro samolyoti Rossiya hududida, Grozniy yaqinida tashqi hujumga uchraganini va deyarli boshqaruvni yo‘qotganini ma’lum qildi. Uning so‘zlariga ko‘ra, samolyot radioelektron kurash vositalari bilan boshqarib bo‘lmaydigan holatga keltirilgan.
Qozog‘iston Favqulodda vaziyatlar vazirligi xabariga ko‘ra, bortda 62 yo‘lovchi va 5 ekipaj a’zosi bo‘lgan:
- 42 nafar Ozarbayjon fuqarosi;
- 16 nafar Rossiya fuqarosi;
- 6 nafar Qozog‘iston fuqarosi;
- 3 nafar Qirg‘iziston fuqarosi.
Omon qolganlar orasida Ozarbayjon, Rossiya va Qirg‘iziston fuqarolari bor. Qozog‘istonliklar orasida omon qolganlar yo‘q.
Izoh (0)