AQSH, Ukraina va Rossiya vakillari Ukrainadagi vaziyatni tartibga solish bo‘yicha muzokaralar olib borish uchun Saudiya Arabistoniga keldi. Ba’zi ommaviy axborot vositalari uchrashuv Ukraina delegatsiyasi ishtirokisiz o‘tishini yozmoqda.
CNN xabariga ko‘ra, AQSH davlat kotibi Marko Rubio, Yaqin Sharq bo‘yicha maxsus elchi Stiv Uitkoff va milliy xavfsizlik bo‘yicha maslahatchi Mayk Uolts muzokaralarda ishtirok etish uchun Saudiyaga ketgan. Qirollik nafaqat muzokaralar uchun maydon taqdim etadi, balki vositachi sifatida ham qatnashadi. Saudiya Arabistoni delegatsiyasiga mamlakatning milliy xavfsizlik bo‘yicha maslahatchisi boshchilik qiladi.
Rossiya tomonidan AQSH bilan muzokaralarda prezident yordamchisi Yuriy Ushakov, Tashqi razvedka xizmati direktori Sergey Narishkin va Rossiya to‘g‘ridan to‘g‘ri investitsiyalar jamg‘armasi rahbari Kirill Dmitriyev ishtirok etadi.
Ukraina iqtisodiyot vaziri Yuliya Sviridenko esa Facebookda Ukraina hukumat delegatsiyasi Saudiya Arabistonida ish boshlaganini ma’lum qildi.
“Yaqin kunlarda prezident Vladimir Zelenskiyning Saudiya Arabistoniga tashrifiga tayyorgarlik ko‘rish uchun o‘nlab uchrashuvlar o‘tkazamiz. Xususan, mintaqa davlatlari bilan muhim iqtisodiy kelishuvlarni imzolashga tayyorlanmoqdamiz”, deb yozgan Ukraina vaziri.
Shu bilan birga, The Washington Post o‘z manbalariga tayanib xabar berishicha, Zelenskiy va uning ofisi rahbari Andrey Yermak Saudiya Arabistonidagi uchrashuvda ishtirok etishni rejalashtirmayapti. Vaholanki, avvalroq Tramp Zelenskiy muzokaralarda ishtirok etishini aytgandi.
Davlat kotibi Marko Rubioga ko‘ra, Ukraina va Rossiya rahbarlari qandaydir taraqqiyotga erishilganda muzokaralarga qo‘shiladi.
Hozir hech qanday jarayon yo‘q, dedi Rubio.
Rossiya va AQSH muzokaralari 18-fevral kuni bo‘lib o‘tishi mumkin
Manbalarga ko‘ra, Saudiya Arabistoni poytaxti Ar-Riyodda 18-fevral kuni Rossiya va AQSH delegatsiyalari ishtirokida Ukraina bo‘yicha muzokaralar bo‘lib o‘tadi.
Yaqin kunlarda Ukraina prezidenti Vladimir Zelenskiy ham Saudiya Arabistonida bo‘ladi. Ushbu Amerika-Rossiya muzokaralarida Kiyev vakili ishtirok etmaydi. Ba’zi ma’lumotlarga ko‘ra, Rossiya delegatsiyasi tarkibiga tashqi ishlar vaziri Sergey Lavrov ham kiradi. 12-fevral kuni AQSH prezidenti Donald Tramp rossiyalik hamkasbi Vladimir Putin bilan telefon orqali suhbatlashdi. Kreml muzokaralar o‘tkazilganini tasdiqladi va Trampni Moskvaga taklif etdi.
Tramp mazkur suhbatdan so‘ng Ukraina prezidentiga ham qo‘ng‘iroq qildi. Zelenskiyning so‘zlariga ko‘ra, tramp suhbatda Putin bilan bo‘lgan muloqotning tafsilotlarini aytib bergan. AQSH prezidenti Ukraina rahbari ham, Putin singari, tinchlik o‘rnatishni istayotganini aytgan.
14-fevral kuni esa Tramp Saudiya Arabistonida Ukrainadagi mojaroni hal etish bo‘yicha muzokaralar o‘tkazilishini ma’lum qildi.
Izoh (0)