Kreml va Oq uy vakillari kelasi hafta Saudiya Arabistonida uchrashishlari kutilmoqda. Bu haqda Bloomberg tegishli manbalarga tayanib xabar berdi.
Ularning aytishicha, Rossiya va AQSH amaldorlari Vladimir Putin va Donald Tramp o‘rtasidagi ehtimoliy muzokaralar uchun “zamin tayyorlaydilar”. Bu muzokaralarda Ukrainadagi urushni to‘xtatish masalasi muhokama etilishi rejalashtirilmoqda.
Bloomberg ma’lumotlariga ko‘ra, uchrashuv tafsilotlari va ishtirokchilar ro‘yxati hali ishlab chiqilmoqda. Taxminlarga ko‘ra, AQSH tomonidan milliy xavfsizlik bo‘yicha maslahatchi Maykl Uolts va maxsus vakil Stiv Vitkoff, Rossiya tomonidan esa tashqi siyosat bo‘yicha maslahatchi Yuriy Ushakov, Tashqi razvedka xizmati direktori Sergey Narishkin va Rossiya to‘g‘ridan to‘g‘ri investitsiyalar jamg‘armasi rahbari Kirill Dmitriyev ishtirok etishi kutilmoqda.
Agentlikning ta’kidlashicha, Ukraina va aksariyat Yevropa mamlakatlarining hukumatlari Rossiya va AQSH amaldorlarining uchrashuvi haqida xabardor qilinmagan. Shu bilan birga, Saudiya Arabistoni rahbariyati muzokaralarga AQSH, Rossiya va Ukraina vakillarini taklif etgan.
Kimdir Saudiya Arabistonida AQSH va Rossiya prezidentlari darajasidagi uchrashuv bo‘lishini aytganini eshitdim. Qandaydir tinchlik muzokaralari emish. Hatto bayrog‘imizni ham qo‘yishibdi. Bu nima ekanligini bilmayman, dedi Ukraina prezidenti Vladimir Zelenskiy jurnalistlar bilan suhbatda.
Bloomberg manbalari ta’kidlashicha, Putin va Trampning Saudiya Arabistonidagi uchrashuvlari fevral oyi oxirida bo‘lib o‘tishi mumkin.
Avvalroq Financial Times nashri Tramp va Putin 20-aprelga to‘g‘ri keladigan Pasxa bayrami yoki 9-mayga qadar Ukrainadagi urushni to‘xtatish bo‘yicha kelishuvga erishishi mumkinligi haqida yozgan edi.
“Putin shunday muhim kunlardan birida kelishuvga erishishni xohlaydi”, deydi ukrainalik amaldor.
Putinga yaqin manbalarga ko‘ra, prezidentning asosiy maqsadi Rossiyaga Yevropadagi ta’sir doirasiga o‘xshash mavqeni ta’minlaydigan yangi xavfsizlik tizimini yaratishdir. Bu xuddi Ikkinchi jahon urushi oxirida Yalta konferensiyasi Sovet ittifoqiga bergan imkoniyatlarga o‘xshash bo‘lishi kutilmoqda.
Hozirgi vaziyat Putin uchun uch yillik urushning boshqa har qanday davridagidan ham qulay ko‘rinmoqda, deb ta’kidlaydi Berlindagi Karnegi Yevroosiyo markazi direktori Aleksandr Gabuyev.
U AQSH Ukrainani harbiy va diplomatik jihatdan qo‘llab-quvvatlashni, razvedka ma’lumotlari almashishni to‘xtatsa, Kiyev juda og‘ir ahvolga tushishi ta’kidladi.
Bu Yevropa davlatlari yanada ko‘proq aralashsa ham, inqirozdan chiqishni kafolatlamaydi, dedi u.
Ta’kidlanishicha, Trampning 12-fevral kuni rossiyalik hamkasbiga telefon qo‘ng‘irog‘i Moskvada sezilarli kayfiyat uyg‘otgan.
Izoh (0)