Rossiya prezident Vladimir Putin hamda Donald Trampning ehtimoliy uchrashuvi uchun Saudiya Arabistoni va BAAni muzokaralar maydoni sifatida ko‘rib chiqilmoqda, deb yozadi Reuters ikki rus manbasiga tayanib.
Agentlik suhbatdoshlariga ko‘ra, so‘nggi haftalarda rossiyalik yuqori martabali amaldorlar Saudiya Arabistoni va BAAga tashrif buyurgan. Biroq, manbalardan biriga ko‘ra, bu g‘oyaga “ba’zi qarshiliklar” mavjud, chunki Saudiya Arabistoni ham, BAA ham AQSH bilan yaqin harbiy va xavfsizlik aloqalariga ega.
2022-yil mart oyida Rossiya va Ukraina o‘rtasidagi birinchi muzokaralar o‘tkazilgan Turkiya bu bosqichda ehtimoliy uchrashuv joyi sifatida ko‘rib chiqilmayapti, deydi Reuters manbalari.
Nashrning xabar berishicha, Saudiya Arabistoni valiahd shahzodasi Muhammad bin Salmon Tramp lavozimga kirishganidan so‘ng qo‘ng‘iroq qilgan birinchi xorijiy davlat rahbari bo‘lgan. Putin esa, 2023-yilda Saudiya Arabistoni va BAAga tashrif buyurib, AQSH va Rossiya o‘rtasida mahbuslar almashinuvini tashkil etishda ko‘rsatgan yordami uchun Muhammad bin Salmonga minnatdorchilik bildirgan.
Reuters ta’kidlashicha, ikki davlat rahbarlari — valiahd shahzoda Muhammad bin Salmon ham, BAA prezidenti Muhammad bin Zoid Ol Nahayon ham Ukrainadagi urush davomida betaraflikni saqlab, Rossiyaga qarshi sanksiyalarga qo‘shilmagan. Shuningdek, BAA Rossiya va Ukraina o‘rtasida asirlarni ayirboshlashda vositachi sifatida ishtirok etgan. Ikki davlat rahbarlari Ukraina prezidenti Vladimir Zelenskiy bilan ham muntazam muloqot olib borishgan.
Bundan tashqari, ikki davlatning hech biri Putinga nisbatan qamoq orderini chiqargan Xalqaro jinoyat sudiga a’zo emas.
Kreml bu borada izoh berishdan bosh tortdi. Saudiya Arabistoni va BAA ham ushbu ma’lumotni sharhlash haqidagi so‘rovlarga javob bermadi.
Trampning Ukrainadagi urushni tugatish bo‘yicha taklifi
Joriy yilning yanvar oyida Tramp Saudiya Arabistoni va OPEK mamlakatlarini neft narxini pasaytirishga chaqirgan edi.
Agar narx pasaysa, Rossiya va Ukraina o‘rtasidagi urush darhol to‘xtardi, deb aytgan u.
AQSH yetakchisi, shuningdek, yana bir bor “Rossiya—Ukraina urushiga chek qo‘yish uchun prezident Putin bilan tez orada uchrashishni xohlashini ta’kidlagan.
Tramp 3-fevral kuni jurnalistlarga ma’muriyati Ukraina, Rossiya va turli tomonlar bilan uchrashuv va muzokaralarni rejalashtirganini aytgan. U boshqa hech qanday tafsilotlarni keltirmagan. AQSH rahbari aynan qaysi tomonlar nazarda tutilganiga ham aniqlik kiritmagan.
Avvalroq Tramp Vashington va Moskva o‘rtasida muhokamalar allaqachon boshlanganini yana bir bor aytib, ularni “juda jiddiy” deb atagan.
Ukraina prezidenti Vladimir Zelenskiy biroz avval mamlakat uch yillik urush mobaynida hech qachon bugungiday tinchlikka yaqin bo‘lmaganini aytdi.
Biz kurashmoqdamiz, yashamoqdamiz, tinchlikka erishish uchun barcha harakatlarni amalga oshirmoqdamiz. Biz uch yillik urush mobaynida hech qachon bugungiday tinchlikka yaqin bo‘lmagan edik. Biz o‘z davlatimizni, mustaqilligimizni, mamlakatimizni, poytaxtimizni, ko‘plab shahar va qishloqlarimizni himoya qildik, dedi u.
Zelenskiy Rossiya prezidenti Vladimir Putin tinchlik muzokaralarini istamasligi va ularni buzishga harakat qilishini qo‘shimcha qildi.
Izoh (0)