AQSH prezidenti Donald Tramp 12-fevral kuni rossiyalik hamkasbi Vladimir Putin bilan muloqot qilgandi. U bundan so‘ng Ukraina prezidenti Vladimir Zelenskiy bilan ham telefon orqali suhbat qildi.
Siyosatchilar ular o‘rtasida bo‘lib o‘tgan telefon suhbati tafsilotlarini ma’lum qildi.
Biz tinchlikka erishish imkoniyatlari haqida uzoq gaplashdik, jamoa bo‘lib birga ishlashga tayyorligimiz va Ukrainaning texnologik imkoniyatlari, jumladan, dronlar va boshqa ilg‘or sohalarni muhokama qildik. Prezident Trampdan birgalikda nimaga erishishimiz mumkinligiga qiziqishi uchun minnatdorman, dedi Zelenskiy.
Ukraina prezidentiga ko‘ra, Tramp suhbatda Putin bilan nimalarni muhokama qilganini aytgan.
Hech kim Ukrainadan ko‘ra ko‘proq tinchlikni xohlamaydi. Qo‘shma Shtatlar bilan birgalikda biz Rossiya agressiyasini to‘xtatish va barqaror tinchlikni ta’minlash ustida keyingi qadamlarimiz xaritasini belgilamoqdamiz. Prezident Tramp aytganidek, keling, buni qilaylik. Biz aloqalarni davom ettirishga kelishib oldik va bo‘lajak uchrashuvlarni rejalashtirdik, deya qo‘shimcha qildi Zelenskiy.
Tramp suhbat haqida
Suhbat tafsilotlarini AQSH prezidenti Donald Tramp ham o‘zining Truth Social sahifasida e’lon qildi. Uning so‘zlariga ko‘ra, “suhbat juda yaxshi o‘tdi”.
U ham prezident Putin kabi tinchlik o‘rnatishni xohlaydi, deb yozgan Tramp.
AQSH prezidenti suhbat asosan vitse-prezident J.D.Vens va Davlat kotibi Marko Rubio ishtirok etadigan 14-fevral kuni Myunxenda bo‘lib o‘tadigan uchrashuv haqida bo‘lganini aytdi.
Umid qilamanki, uchrashuvning natijalari ijobiy bo‘ladi. Ommaviy va mutlaqo keraksiz qurbonlar va vayronagarchiliklarga sabab bo‘lgan bu bema’ni urushni to'xtatish vaqti keldi. Rossiya va Ukraina xalqlarini o‘z panohida asrasin!, dedi Tramp.
Tramp va Putin suhbati
AQSH prezidenti rossiyalik hamkasbi bilan suhbatni “uzoq davom etgan juda samarali” deb ta’rifladi. Ikkala yetakchi ham Rossiya va Ukraina mojarosida odamlar o‘limini to‘xtatish kerakligi haqida kelishib olganini aytdi.
Biz, shuningdek, tegishli jamoalarimiz zudlik bilan muzokaralarga kirishishi haqida kelishib oldik, dedi Tramp.
Tomonlar, shuningdek, quyidagilarni muhokama qildilar:
- Yaqin Sharq;
- energetika;
- sun’iy intellekt;
- dollar ta’siri.
Biz ikkimiz ham xalqlarimizning buyuk tarixi va Ikkinchi jahon urushida birgalikda muvaffaqiyatli jang qilganimiz haqida o‘yladik, deb yozgan Tramp.
Muzokaralar o‘tkazilganini Kreml ham tasdiqladi. Rossiya prezidenti matbuot kotibi Dmitriy Peskovning ma’lum qilishicha, davlat rahbarlari qariyb ikki soat suhbatlashgan. Putin Trampni Moskvaga taklif qilgan.
Rossiya prezidenti AQSH prezidentini Moskvaga taklif qildi va o‘zaro manfaatli ish yo‘nalishlari, jumladan, Ukraina masalasini hal qilish mavzusi bo‘yicha Amerika rasmiylarini Rossiyada qabul qilishga tayyorligini bildirdi, deydi Peskov.
Izoh (0)