Saudiya Arabistonining Buyuk Britaniyadagi elchisi, shahzoda Xolid bin Bandar Al-Saudning ta’kidlashicha, mamlakat hukumati 2034-yilgi futbol bo‘yicha Jahon chempionati vaqtida alkogolli ichimliklar sotilishiga ruxsat berish uchun qonunlarni o‘zgartirish niyatida emas va hech qanday istisno qilinmaydi.
-c3a4SIjD.jpg)
2023-yil dekabr oyida Xalqaro futbol federatsiyasi (FIFA) kongressi Saudiya Arabistonini 2034-yilgi Jahon chempionati mezboni sifatida tasdiqladi. Keyinchalik FIFA vakillari musobaqa tashkilotchilari bilan stadionlarda pivo sotish bo‘yicha mahalliy qonunchilikka zid keladigan muzokaralar o‘tkazish rejalari yo‘qligini bildirgan edi.
Shahzoda Xolid bin Bandar Al-Saud turnirga keladigan mehmonlar Fors ko‘rfazi davlatining madaniyatiga hurmat bilan yondashishi kerakligi va musobaqa davomida, hatto mehmonxonalar ichida ham, alkogol sotilmasligini ta’kidladi.
“Biz alkogol iste’mol qilishga ruxsat bermaymiz. Spirtli ichimlik ichmasdan ham ajoyib vaqt o‘tkazish mumkin. Agar turnirdan keyin ichishni xohlasangiz, marhamat, lekin hozircha bizda alkogol yo‘q. Mamlakatimizning ob-havosi quruq. Bizning yurtimiz ham bu borada ‘quruq’ ” deya shahzoda Bandar Al-Saudning so‘zlarini keltiradi Britaniyaning LBC radiostansiyasi.
Saudiya Arabistonida alkogol sotilishining taqiqlanishi muxlislarga qanchalik qulay bo‘lishi haqidagi savolga elchi quyidagicha javob berdi:
“Har bir mamlakatning o‘z madaniyati bor. Biz mehmonlarni qabul qilishga tayyormiz, ammo o‘z madaniyatimizni boshqalar uchun o‘zgartirishni istamaymiz”.
U shuningdek hazil bilan “Chindan ham, spirtli ichimliklarsiz yashay olmaysizmi?” deya qo‘shimcha qildi.
Inson huquqlari tashkilotlari Saudiya Arabistonida Jahon chempionati o‘tkazilishi bo‘yicha xavotir bildirgan. Amnesty International turnir mezbonligi berilishidan oldin migrant ishchilarning ekspluatatsiya qilinishi va ko‘pchiligi halok bo‘lishi mumkinligini ta’kidlagan edi.
Shuningdek, Saudiya Arabistonida LGBTQIA+ jamoasi vakillariga nisbatan diskriminatsiya bo‘lishi mumkinligi ham asosiy tashvishlardan biri sifatida ko‘rilmoqda. Mamlakat qonunchiligiga ko‘ra, bir jinsli shaxslar o‘rtasidagi jinsiy munosabat isbotlansa, hatto o‘lim jazosiga hukm qilinishi mumkin.
Shu sababli, Jahon chempionatiga LGBT jamoasiga mansub muxlislar kelishi mumkinmi, degan savolga elchi shunday javob berdi:
“Bu faqat Saudiya Arabistonining musobaqasi emas, balki jahon darajasidagi turnirdir. Biz imkon qadar, kelishni istaganlarning barchasini kutib olishga tayyormiz”.
2022-yilda Qatarda o‘tkazilgan Jahon chempionati oldidan alkogol sotilishi masalasi ko‘plab muhokamalarga sabab bo‘lgandi. FIFA dastlab stadionlarda pivo sotishga ruxsat bergan edi, lekin turnir boshlanishiga ikki kun qolganida, yakuniy muzokaralar natijasida bu qaror bekor qilindi. Natijada muxlislar faqat mehmonxonalar va maxsus fan-zonalarda alkogolli ichimliklar xarid qilish imkoniyatiga ega bo‘lishdi. FIFA pivo ishlab chiqaruvchi kompaniyaga taxminan 40 million funt sterling miqdorida kompensatsiya to‘lashga majbur bo‘lgandi.
Izoh (0)