Myunxen markazida Mini Cooper avtomobili Verdi kasaba uyushmasi namoyishi ishtirokchilarini bosib ketdi. Bu haqda politsiyaga tayanib Bild xabar bermoqda.
So‘nggi ma’lumotlarga ko‘ra, hodisa oqibatida kamida 27 kishi jarohatlangan. Voqea joyida favqulodda xizmatlar ishlamoqda, jabrlanganlar shifoxonalarga yetkazilmoqda.
Politsiya ma’lumotlariga ko‘ra, 13-fevral kuni ertalab soat taxminan 10:30 da haydovchi Mini Cooper avtomobilini Myunxen markazida kasaba uyushmalari namoyishida ishtirok etayotgan bir guruh odamlarga qarata haydagan. Bild’ga ma’lum bo‘lishicha, ikki kishining ahvoli og‘ir. Jabrlanganlar orasida bolalar ham borligi aytilmoqda.
Politsiyachilar haydovchi olomonga qasddan urilganmi yoki gaz va tormoz pedallarini adashtirib yuborganligiga aniqlik kiritmoqda. Avtomobilni boshqargan shaxs allaqachon qo‘lga olingan. Hodisadan oldin o‘q ovozlari eshitilgan, biroq bu ma’lumotlar hozircha rasman tasdiqlanmagan.
Avtomobilni boshqargan deb taxmin qilinayotgan shaxs qo‘lga olingan. U 24 yoshli Afg‘oniston fuqarosi ekani aytilmoqda.
Bu mamlakatda avtomobilda sodir etilgan ilk terakt emas. 2024-yilning 21-dekabr kuni Germaniyaning Magdeburg shahridagi Rojdestvo yarmarkasida qora rangli BMW avtomobili katta tezlikda odamlar to’planib turgan joyga bostirib kirishi oqibatida 11 kishi halok bo‘lgan, yana 60 kishi jarohatlangan edi. Mazkur teraktni sodir etgan shaxs 50 yoshli asli saudiyalik Tolib al Abdulmuhsin bo‘lib, u 2006-yilda Germaniyaga o‘qish uchun kelgan. Ijtimoiy tarmoqlarda Islom diniga qarshi bo‘lgan postlar yozib, Saudiya Arabistoni hukumatini tanqid qilib yurgan.
O'zining vatani Saudiya Arabistonida u terrorizm, odam savdosi bilan bog'liq ayblovlar bilan qidirilmoqda. Germaniya o‘z vaqtida Abdulmuhsinni saudiyaliklarga ekstraditsiya qilishdan bosh tortgan.
Izoh (0)