AQSH prezidenti Donald Tramp Ukrainadagi urushni tezroq tugatish uchun Saudiya Arabistoni va OPEKni neft narxlarini pasaytirishga chaqirdi. U tegishli bayonotni Davosda bo‘lib o‘tgan Jahon iqtisodiy forumida ma’lum qildi. Bu haqda Deutsche Welle xabar berdi.
-hf_1wvSR.jpg)
Men Saudiya Arabistoni va OPEKdan neft narxini pasaytirishni so‘rayman. To‘g‘risini aytsam, ular buni saylovdan oldin qilmaganiga hayronman. Agar narx pasaysa, Rossiya va Ukraina urushi darhol tugardi. Ayni paytda mazkur urush davom etishi uchun narx ancha yuqori. Neft narxini pasaytirish kerak. Siz bu urushga chek qo‘yishingiz mumkin. Ular buni allaqachon qilishi kerak edi, dedi Tramp.
Hozirgi vaqtda neft narxi bir barrel uchun taxminan 80 dollarni tashkil etadi. Trampning nutqi paytida uning narxi deyarli bir dollarga tushdi. Oq uy rahbariga ko‘ra, uning jamoasining mojaroni hal qilish bo‘yicha sa’y-harakatlari allaqachon boshlangan. Tramp Kiyev muzokaralar va kelishuvga tayyorligini aytdi.
Siyosatchi Ukrainadagi urushni yakunlash uchun yaqin orada Rossiya prezidenti Vladimir Putin bilan uchrashishni xohlashini ta’kidladi.
Men bu urushga yakun yasash uchun prezident Putin bilan uchrashishdan juda mamnun bo‘laman. Millionlab jonlar, ajoyib, iste’dodli yoshlar jang maydonida halok bo‘lmoqda. Sodir bo‘layotgan voqealarning suratlarini ko‘rdim: haqiqiy qonli qirg‘in. Men hatto iqtisodiy yo‘qotishlar, tabiiy boyliklarning yo‘qolishi haqida ham gapirmayapman. Men faqat inson hayotining yo‘qolishi haqida gapiryapman. Shaharlar vayron bo‘lmoqda: bino ketidan bino qulamoqda. Biz bu dahshatni to‘xtatishimiz kerak, dedi Tramp.
AQSH prezidenti tinchlik jarayonida Xitoyning ehtimoliy roli haqida alohida to‘xtaldi. U Pekin va Vashington o‘rtasidagi munosabatlar “juda yaxshi” ekanini ta’kidladi.
Xitoy Rossiyaga ta’sir o‘tkazib, urushni darhol tugatishga majbur qilish uchun yetarli kuchga ega. Biz buni Xitoy bilan hamkorlikda amalga oshiramiz, dedi Tramp.
Saudiya Arabistoni AQSHga 600 mlrd dollar sarmoya kiritmoqchi
Ushbu investitsiyalar to‘rt yilga ajratiladi va qaysi sohalarga yo‘naltirilishi aniqlashtirilmagan. So‘nggi yillarda AQSH Saudiya Arabistoni neft eksportiga qaramlikdan tobora uzoqlashmoqda.
Valiahd shahzodaning bayonoti AQSH prezidenti Donald Trampning izohidan keyin yangradi. Avvalroq Tramp investitsiya narxini oshirsa, birinchi xorijiy tashrifni qirollikdan boshlashini aytgandi.
Saudiya Arabistoni Amerikaga 600 milliard dollar sarmoya kiritadi, lekin men valiahd shahzodadan uni 1 trillionga aylantirishni so‘rayman, chunki u yaxshi yigit, degan AQSH prezidenti.
♦ Ukrainaning urushni tugatish shartlari
Ukraina qo‘shinlarni 1991-yil chegaralariga olib chiqishni nazarda tutuvchi “tinchlik formulasi”ni amalga oshirishni talab qilmoqda. Gap 2014 va 2022-yillarda Rossiya tomonidan u yerda o‘tkazilgan “referendumlar” va Ukrainaning Qrim, Donetsk, Lugansk, Xerson va Zaporojye viloyatlari noqonuniy anneksiya qilingani haqida ketmoqda. Moskva “tinchlik formulasi” asosida muzokaralar olib borish imkoniyatini istisno qiladi.
♦ Rossiya shartlari
Putin o‘t ochishni to‘xtatish uchun o‘z shartlarini ilgari surdi, jumladan, Ukraina qo‘shinlari o‘zini o‘zi mustaqil deb e’lon qilingan DXR, LXR, Xerson va Zaporojye viloyatlaridan olib chiqilishi, ushbu to‘rtta hudud va Qrim go‘yoki xalqaro miqyosda Rossiyaning bir qismi sifatida tan olinishi, Ukrainaning NATOga a’zolikdan voz kechishi va sanksiyalarni olib tashlash. Zelenskiy bu taklifni “ishonib bo‘lmaydigan” ultimatum deb atadi.
Izoh (0)