Ijtimoiy tarmoqlarda umra va hajga boruvchilarga meningitga qarshi emlanish talabi bekor qilingani haqida xabarlar tarqaldi. Sanepidqo‘mita matbuot xizmati buni rad etdi.
Saudiya Arabistoni qirolligi Sog‘liqni saqlash vazirligi 2024-yilning dekabr oyida 2025-yildan boshlab umra va haj amallarini bajarish uchun keladigan barcha ziyoratchilarning meningit infeksiyasiga qarshi emlanganlik to‘g‘risidagi hujjati bo‘lishi shartligini talab qiluvchi me’yoriy hujjat chiqargandi.
Sanepidqo‘mita “haj va umra ziyoratlariga borishda meningitga qarshi vaksina olish kerak deyilgan qaror bekor qilindi, endi vaksina olmasdan umraga borsangiz bo‘ladi”, degan mazmundagi xabarlar haqiqatga to‘g‘ri kelmasligini, Saudiya Arabistoni umra va haj ziyoratlariga boruvchilarda meningit kasalligiga qarshi emlanganlik haqida hujjat bo‘lishi zarurligini rasman bekor qilmaganini ma’lum qildi.
“Mamlakatimizga yuqumli kasalliklarning chetdan kirib kelishini oldini olish va epidemiologik barqarorlikni saqlab qolish maqsadida ziyoratchilarni meningitga qarshi emlash tavsiya etiladi”, deyiladi qo‘mita xabarida.
Viza turidan qat’i nazar, Saudiya Arabistoni hududiga kelayotganlar to‘rt komponentli Neisseria vaksinasi, polisaxarid yoki konyugirlangan vaksina bilan emlanishlari shart. Ular to‘rt komponentli vaksina uchun kelishlaridan kamida o‘n (10) kun oldin, polisaxarid vaksina uchun uch (3) yildan ko‘p bo‘lmagan muddatda yoki konyugirlangan vaksina uchun besh (5) yildan ko‘p bo‘lmagan muddatda berilgan emlash sertifikatiga ega bo‘lishi lozim.
Bir yoshgacha bo‘lgan bolalarga emlash talab qilinmaydi. Emlanishni sayohatdan kamida 10 kun oldin rejalashtirish tavsiya etiladi.
Izoh (0)