АҚШ, Украина ва Россия вакиллари Украинадаги вазиятни тартибга солиш бўйича музокаралар олиб бориш учун Саудия Арабистонига келди. Баъзи оммавий ахборот воситалари учрашув Украина делегацияси иштирокисиз ўтишини ёзмоқда.
CNN хабарига кўра, АҚШ давлат котиби Марко Рубио, Яқин Шарқ бўйича махсус элчи Стив Уиткофф ва миллий хавфсизлик бўйича маслаҳатчи Майк Уолтс музокараларда иштирок этиш учун Саудияга кетган. Қироллик нафақат музокаралар учун майдон тақдим этади, балки воситачи сифатида ҳам қатнашади. Саудия Арабистони делегациясига мамлакатнинг миллий хавфсизлик бўйича маслаҳатчиси бошчилик қилади.
Россия томонидан АҚШ билан музокараларда президент ёрдамчиси Юрий Ушаков, Ташқи разведка хизмати директори Сергей Наришкин ва Россия тўғридан тўғри инвестициялар жамғармаси раҳбари Кирилл Дмитриев иштирок этади.
Украина иқтисодиёт вазири Юлия Свириденко эса Facebookда Украина ҳукумат делегацияси Саудия Арабистонида иш бошлаганини маълум қилди.
“Яқин кунларда президент Владимир Зеленскийнинг Саудия Арабистонига ташрифига тайёргарлик кўриш учун ўнлаб учрашувлар ўтказамиз. Хусусан, минтақа давлатлари билан муҳим иқтисодий келишувларни имзолашга тайёрланмоқдамиз”, деб ёзган Украина вазири.
Шу билан бирга, The Washington Post ўз манбаларига таяниб хабар беришича, Зеленский ва унинг офиси раҳбари Андрей Ермак Саудия Арабистонидаги учрашувда иштирок этишни режалаштирмаяпти. Ваҳоланки, аввалроқ Трамп Зеленский музокараларда иштирок этишини айтганди.
Давлат котиби Марко Рубиога кўра, Украина ва Россия раҳбарлари қандайдир тараққиётга эришилганда музокараларга қўшилади.
Ҳозир ҳеч қандай жараён йўқ, деди Рубио.
Россия ва АҚШ музокаралари 18 февраль куни бўлиб ўтиши мумкин
Манбаларга кўра, Саудия Арабистони пойтахти Ар-Риёдда 18 февраль куни Россия ва АҚШ делегациялари иштирокида Украина бўйича музокаралар бўлиб ўтади.
Яқин кунларда Украина президенти Владимир Зеленский ҳам Саудия Арабистонида бўлади. Ушбу Америка-Россия музокараларида Киев вакили иштирок этмайди. Баъзи маълумотларга кўра, Россия делегацияси таркибига ташқи ишлар вазири Сергей Лавров ҳам киради. 12 февраль куни АҚШ президенти Дональд Трамп россиялик ҳамкасби Владимир Путин билан телефон орқали суҳбатлашди. Кремль музокаралар ўтказилганини тасдиқлади ва Трампни Москвага таклиф этди.
Трамп мазкур суҳбатдан сўнг Украина президентига ҳам қўнғироқ қилди. Зеленскийнинг сўзларига кўра, трамп суҳбатда Путин билан бўлган мулоқотнинг тафсилотларини айтиб берган. АҚШ президенти Украина раҳбари ҳам, Путин сингари, тинчлик ўрнатишни истаётганини айтган.
14 февраль куни эса Трамп Саудия Арабистонида Украинадаги можарони ҳал этиш бўйича музокаралар ўтказилишини маълум қилди.
Изоҳ (0)