AQSH prezidenti Donald Tramp G‘azo sektorini sotib olib, uning ustidan nazorat o‘rnatishi va keyin arab davlatlari yordamida qayta tiklashi mumkinligini aytdi. Bu haqda Reuters xabar berdi.
Tramp tegishli bayonotini Nyu Orleanga uchayotganda Air Force One samolyoti bortida aytgan.
“G‘azoni sotib olish va unga egalik qilishga qaror qildim. Qayta tiklash masalasiga kelsak, biz uni Yaqin Sharqdagi boshqa davlatlarga topshirishimiz mumkin, ular alohida qismlarni qayta qurishlari uchun yoki boshqalar bizning homiyligimiz ostida buni amalga oshirishi mumkin”, dedi AQSH prezidenti.
Uning tushuntirishicha, AQSH HAMASning hududga qaytishiga yo‘l qo‘ymaslik uchun G‘azo sektorini o‘z nazoratida saqlab turishga majbur.
“U yerga qaytadigan joy yo‘q. Bu joy butunlay buzib tashlanishi kerak. Qolgan qismlari ham buzib tashlanadi. Hammasi yo‘q qilinadi”, dedi siyosatchi.
Tramp, shuningdek, ba’zi falastinlik qochqinlarni AQSHga kiritish imkoniyatiga ochiqligini, biroq bunday so‘rovlarni alohida ko‘rib chiqishini aytdi.
Uning G‘azoni sotib olish va unga egalik qilish haqidagi so‘nggi so‘zlarini HAMAS siyosiy byurosi a’zosi Ezzat El Rashq qoraladi.
“G‘azo sotiladigan va sotib olinadigan mulk emas. Bu bizning bosib olingan Falastin yerimizning ajralmas qismidir”, dedi u va falastinliklar ko‘chirish rejalariga qarshiligini aytdi.
Tramp: “AQSH G‘azo sektorini boshqaradi”
AQSH prezidenti G‘azo sektorini “snos” maydonchasi deb atagandi. U anklav aholisini turli mamlakatlarga, jumladan, Iordaniya va Misrga ko‘chirib o‘tkazish mumkinligini aytgan. U Qo‘shma Shtatlar bu jarayonni moliyalashtirmasligi, chunki xarajatlarni qoplashga Yaqin Sharq davlatlarining qurbi yetishini ta’kidlagandi. Vashington esa mintaqadagi ishlar uchun javobgar bo‘ladi va zarurat tug‘ilganda u yerga o‘z qo‘shinlarini yuborishi mumkinligini aytgan.
Ushbu taklifga javoban arab davlatlari yetakchilari AQSH davlat kotibiga maktub yo‘llab, falastinliklarni chiqarib yuborishga yo‘l qo‘yib bo‘lmasligi, buni nafaqat xalqaro huquqning buzilishi, balki mintaqaviy xavfsizlikka tahdid deb atagan.
Saudiya Arabistoni hukumati o‘z bayonotida falastinliklarni o‘z yerlaridan siqib chiqarishga qaratilgan har qanday urinishlarni qabul qilmasligini ta’kidlab, Falastin davlati tuzilmagunicha Isroil bilan munosabat o‘rnatmasligini e’lon qildi.
HAMAS Trampning G‘azodagi falastinliklarni chiqarib yuborishga chaqirgan da’vatlarini qoralab, ularni “o‘z yeridan quvish” deb atadi.
Avstraliyaning mahalliy aholisi vakili bo‘lgan siyosatchi Lidiya Torp Trampning G‘azoni “egallash” haqidagi fikrlarini “etnik tozalash va mustamlakachilikning ochiq chaqirig‘i” deb baholadi.
Amnesty International inson huquqlari tashkiloti o‘tgan yilning noyabr oyida Xalqaro jinoiy sud (XJS) Netanyaxuni qamoqqa olish uchun order bergan bo‘lsa-da, uni qamoqqa olmasdan, AQSH “xalqaro odil sudlovga nisbatan nafratini namoyish etayotganini” bildirdi.
AQSHda bir qator demokratlar Trampning rejasini tanqid qildi, demokrat senator Kris Merfi esa AQSHning G‘azoga bostirib kirishi minglab amerikalik askarlarning halok bo‘lishiga va Yaqin Sharqda o‘n yillab davom etadigan urushga olib kelishini ta’kidladi.
Izoh (0)