AQSH prezidenti Donald Tramp inauguratsiyadan so‘ng Ukrainadagi mojaroni hal qilish taktikasini o‘zgartirdi. Bu haqda The Conversation portali xabar bermoqda.
Nashrning ta’kidlashicha, Tramp inauguratsiyadan bir necha kun o‘tib e’lon qilgan Rossiyaga qarshi yangi sanksiyalarni joriy etish tahdidi uning o‘tmishdoshi Jo Baydenning Rossiyaga bosim o‘tkazish uchun xuddi shu usullardan foydalangan yo‘liga ko‘proq o‘xshaydi.
Qo‘shma Shtatlarning tashqi siyosati prezidentdan prezidentga qadar ichki siyosat kabi sezilarli darajada o‘zgarmaydi, deb ta’kidlaydi portal.
Shu bilan birga, maqola muallifining fikricha, Tramp mojaroni hal qilishda Baydendan farqli o‘laroq, muzokaralarga undash uchun nafaqat Moskvaga, balki Kiyevga ham bosim o‘tkazadi.
Amerikaning yangi rahbari, shuningdek, sanksiyalar masalasida demokratlardan ancha nariga o‘tishga va agar kerak bo‘lsa, Xitoy va Hindistonga nisbatan cheklovlar o‘rnatishga tayyor, deb hisoblaydi The Conversation.
Avvalroq The Wall Street Journal gazetasi Tramp o‘zining Ukraina bo‘yicha maxsus vakili Kit Kellog oldiga Ukraina mojarosini 100 kunda tugatish vazifasini qo‘yganini xabar qilgan edi. Uning so‘zlariga ko‘ra, “Rossiya prezidenti Vladimir Putin bilan kelishuv tuzish Tramp prezident lavozimiga kirishdan oldin mojaroni to‘xtatishini e’lon qilgan saylovoldi kampaniyasi paytidagidan ancha murakkabroq vazifa bo‘ladi”.
21 yanvar kuni Tramp Kiyevga Amerika qurolini yetkazib berishni butunlay to‘xtatish ehtimolini istisno qilmadi, shuningdek, Rossiya prezidenti bilan “istalgan vaqtda” uchrashishga tayyorligini bildirdi.
AQSH prezidenti, shuningdek, Ukrainadagi urushni tezroq tugatish uchun Saudiya Arabistoni va OPEKni neft narxlarini pasaytirishga chaqirdi.
Men Saudiya Arabistoni va OPEKdan neft narxini pasaytirishni so‘rayman. To‘g‘risini aytsam, ular buni saylovdan oldin qilmaganiga hayronman. Agar narx pasaysa, Rossiya va Ukraina urushi darhol tugardi. Ayni paytda mazkur urush davom etishi uchun narx ancha yuqori. Neft narxini pasaytirish kerak. Siz bu urushga chek qo‘yishingiz mumkin. Ular buni allaqachon qilishi kerak edi, dedi Tramp.
Hozirgi vaqtda neft narxi bir barrel uchun taxminan 80 dollarni tashkil etadi. Trampning nutqi paytida uning narxi deyarli bir dollarga tushdi. Oq uy rahbariga ko‘ra, uning jamoasining mojaroni hal qilish bo‘yicha sa’y-harakatlari allaqachon boshlangan. Tramp Kiyev muzokaralar va kelishuvga tayyorligini aytdi.
Izoh (0)