AQSH prezidenti Donald Tramp va Rossiya prezidenti Vladimir Putin telefon orqali uzoq suhbatlashdi. Bu haqda Donald Tramp ma’lum qildi.
Amerika prezidenti suhbatni “uzoq davom etgan juda samarali” deb ta’rifladi. Uning so‘zlariga ko‘ra, ikkala yetakchi ham Rossiya va Ukraina mojarosida odamlar o‘limini to‘xtatish kerakligi haqida kelishib olgan.
Biz, shuningdek, tegishli jamoalarimiz zudlik bilan muzokaralarga kirishishi haqida kelishib oldik, dedi Tramp.
Amerika prezidenti dastlabki harakatlarni “Ukraina prezidenti Zelenskiyga qo‘ng‘iroq qilib, bo‘lib o‘tgan suhbat haqida uni xabardor qilishdan boshlashi”ni ta’kidladi.
Tomonlar, shuningdek, quyidagilarni muhokama qildilar:
- Yaqin Sharq;
- energetika;
- sun’iy intellekt;
- dollar ta’siri.
Biz ikkimiz ham xalqlarimizning buyuk tarixi va Ikkinchi jahon urushida birgalikda muvaffaqiyatli jang qilganimiz haqida o‘yladik, deb yozgan Tramp.
Muzokaralar o‘tkazilganini Kreml ham tasdiqladi. Rossiya prezidenti matbuot kotibi Dmitriy Peskovning ma’lum qilishicha, davlat rahbarlari qariyb ikki soat suhbatlashgan. Putin Trampni Moskvaga taklif qilgan.
Rossiya prezidenti AQSH prezidentini Moskvaga taklif qildi va o‘zaro manfaatli ish yo‘nalishlari, jumladan, Ukraina masalasini hal qilish mavzusi bo‘yicha Amerika rasmiylarini Rossiyada qabul qilishga tayyorligini bildirdi, deydi Peskov.
New York Post nashri 9-fevral kuni Tramp rossiyalik hamkasbi bilan telefon orqali Ukrainadagi urushni yakunlashni muhokama qilgani haqida yozgan edi. Tramp ikki yetakchi o‘rtasidagi suhbat qancha davom etganini ma’lum qilmagan. AQSH prezidenti jang maydonida harbiylarning halok bo‘lishi Putinni “chindan ham tashvishga solayotgani”ni ta’kidlagan. AQSH prezidenti urushni tugatishga yordam beradigan “aniq rejasi” borligini aytib, tafsilotlarni keltirmagan.
Izoh (0)