O‘zbekiston fuqarolari qonuniy tarzda Niderlandiyaga ishga yuborilishi mumkin. Bu haqda “Dunyo” axborot agentligi xabar berdi.
Ma’lum qilinishicha, O‘zbekiston elchisi G‘ayrat Fozilov Niderlandiyaning EuroTalents rekruting agentligi direktori va agentlik hammuassisi bilan uchrashdi. Muzokaralar chog‘ida O‘zbekistondan Niderlandiyaga ishchi kuchini jalb qilish, shuningdek, Migratsiya agentligi va EuroTalents rekruting agentligi o‘rtasida hamkorlik aloqalarini o‘rnatish masalalari muhokama qilindi.
Niderlandiya vakillariga O‘zbekistonda migratsiyani tartibga solishga oid mamlakat rahbariyati tomonidan qabul qilingan qarorlar to‘g‘risida ma’lumotlar berildi. Prezidentning 2024-yil 17-oktyabrdagi “Xorijda mehnat faoliyatini amalga oshirish jarayonlarini tartibga solish bo‘yicha qo‘shimcha chora-tadbirlar to‘g‘risida”gi qarorining mazmun-mohiyatiga e’tibor qaratildi.
Bundan tashqari, mehnat migratsiyasi sohasi Yevropa davlatlari va O‘zbekiston o‘rtasidagi hamkorlikning o‘zaro manfaatli yo‘nalishi ekani qayd etildi. O‘zbekiston bu borada Germaniya, Buyuk Britaniya, Yaponiya, Koreya Respublikasi, Isroil, Kanada, Polsha, Turkiya, Saudiya Arabistoni, Xitoy kabi xorijiy sheriklar bilan samarali hamkorlikni yo‘lga qo‘ygani ta’kidlandi.
Niderlandiyaliklar O‘zbekiston bilan logistika va transport, qurilish va infratuzilmani rivojlantirish, texnologiya, mehmonxona biznesi va tibbiyot kabi sohalarda mehnat resurslarini jalb qilish sohasida hamkorlikni yo‘lga qo‘yishdan manfaatdor ekanini bildirdi.
EuroTalents rekruting agentligi rahbariyati Benilyuks mamlakatlaridagi kompaniyalar xorijiy ishchi kuchini faqat qonuniy asosda yollashini qayd etdi. Ta’kidlanishicha, agentlik xorijiy fuqarolarni yollash jarayonining barcha bosqichlari, jumladan, shartnomalar tuzish, ish haqi, uy-joy bilan ta’minlash va qonunchilikka rioya qilish, kadrlarga bo‘lgan ehtiyojni hal etishga yaqindan ko‘maklashadi.
Uchrashuv yakunida hamkorlikning barcha tafsilotlarini muhokama qilish maqsadida Migratsiya agentligi va EuroTalents rekruting agentligi rahbariyati o‘rtasida onlayn muzokaralar o‘tkazish bo‘yicha kelishuvga erishildi.
Bundan avval Litva korxonalari bilan 200 nafar O‘zbekiston fuqarosini ishga joylashtirish to‘g‘risida kelishuvga erishilgandi. Shuningdek, o‘zbekistonliklar Yaponiyaga logistika, aeroport xizmati va yuk tashish yo‘nalishlarida ishga yuborililishi aytilgandi.
O‘zbekistonda 2018—2023-yillarda aholi daromadining 16 foizi migrantlar ulushiga to‘g‘ri kelgan. Chet ellarda ishlayotgan yurtdoshlar har yili O‘zbekistonga o‘n ikki-o‘n besh milliard dollar jo‘natadi.
Izoh (0)