O‘zbek teleekranlarida tobora ommalashib borayotgan turk seriallari nafaqat bizda, balki ko‘plab xorijiy mamlakatlarda sevib tomosha qilinadi. Bugungi kunda Turkiya AQSHdan keyingi eng ko‘p serial sotuvchi ikkinchi mamlakatga aylangan. Xalqaro miqyosda eksport qilingan turk loyihalari orasida shunday seriallar borki, ular ko‘p reklama qilinmagan bo‘lsa-da, qiziqarli syujeti va ta’sirli hikoyalari bilan tomoshabinlarni ekran qarshisiga mixlab qo‘yadi.
“Sham ko‘targan yolg‘onchilar”
Serialda opa-singillardek yaqin bo‘lgan to‘rt dugona haqida hikoya qilinadi. Erkin va mustaqil Jeyda, muvaffaqiyatli psixiatr Meliha, oilaviy muammolari bo‘lgan shifokor Shebnem va nihoyat, baxtsiz hodisada erini yo‘qotgan kafe egasi Elif bosh rollarda chiqadi. Ayollar Elifga hayotda o‘z o‘rnini topishga va qizi Ternga munosib hayot kechirishga harakat qilib, qayg‘usini yengishga yordam beradi. Ternning maktabdagi dugonasining otasi Yakup bilan uchrashuv Elifning hayotini tubdan o‘zgartirib yuboradi.
“Nikoh haqida barcha haqiqatlar”
To‘rt opa-singil Cho‘lpan, Azra, Gunesh va Sanem Istanbulga ko‘chib o‘tadi va yuridik sohada karyera qiladi. Ularning barchasi ajrim jarayonlari bilan shug‘ullanadi. Qizlarning har birining shaxsiy hayoti turlicha rivojlanadi. Cho‘lpan eridan ajrashgan, Sanem nikohga umuman ishonmaydi, Azra baxtli turmush qurgan, Gunesh esa sevgan insoniga turmushga chiqish harakatida. Bir kuni opa-singillarning hayotida kutilmagan voqea sodir bo‘ladi: ularning otasi ko‘p yillar oldin boshqa ayolni deb qizlarning onasini tashlab ketgandi. Shunda qahramonlar oldida o‘z otasini kechirish yoki kechirmaslik tanlovi turadi.
“Yangi hayot”
Harbiy sohada xizmat qilgan kapitan Adem nafaqaga chiqadi. U xavfli hayot tarzida yashashga odatlangani bois endilikda tinch hayotda o‘z o‘rnini topishga harakat qiladi. Ammo, oilasini boqish uchun ish topishi ham kerak bo‘ladi. Adem boy va nufuzli Temurning xotiniga tansoqchi bo‘lib ishga kiradi. Avvaliga u yosh va go‘zal Yosamin bilan kelisholmaydi. Qiz hatto Ademni ishdan bo‘shatmoqchi bo‘ladi. Ammo qattiqqo‘l erkak va jozibali ayol o‘rtasida kutilmagan ishlar sodir bo‘ladi.
“Shisha ortidagi qiz”
Sedat Ko‘ro‘g‘li – Turkiyadagi eng yirik mehmonxonalar tarmog‘iga egalik qiluvchi badavlat oilaning erka merosxo‘ri. Uning turmush qurgan ayol bilan ishqiy munosabati otasi Rafetni g‘azablantiradi va o‘g‘lini zudlik bilan uylantirishga qaror qiladi. Kelin ham tezda topiladi: u yangi mehmonxona loyihasi ustida ishlayotgan arxitektor Nalan bo‘ladi. Bekam-u ko‘stlikda o‘sgan beg‘am yigit va halol hamda tartibli qiz to‘yga hozirlik ko‘radi. Ammo ularning baxtiga o‘tmish sirlari to‘sqinlik qiladi.
“Shunchaki do‘stlar”
Karyera qurishga mukkasidan ketgan Eje va kelishgan yigit Umut ko‘p yillardan buyon bir-birini yaxshi biladi. Ular o‘zlarini ham, atrofdagilarni ham o‘rtalarida hech qanday romantika yo‘qligiga ishontiradi. Ular Umutning konservativ xolasiga tegishli, Bosforga qaragan hashamatli uyda birga yashash uchun o‘zlarini kelin-kuyov qilib ko‘rsatishadi. Biroq badavlat qarindosh tez orada nima bo‘layotganini tushunadi va shart qo‘yadi: u uyini kim birinchi qonuniy nikohdan o‘tsa, o‘shanga qoldirishga qaror qiladi. Eje va Umut chinakam muhabbatni topish uchun uzoqqa borish shart emasligini tan olmay, o‘zlariga turmush o‘rtoq izlay boshlaydi.
“Sendan go‘zalroq”
Efsun keksa otasi bilan Gaziantep nomli kichik shahardagi fermada yashaydi. Qiz onasini 12 yoshidan beri ko‘rmay kelgani uchun uni topishga ham urinmaydi. Efsun iste’dodli shifokor bo‘lishiga qaramay, poytaxtga ishga ketmaydi va o‘zi tug‘ilib o‘sgan shaharchasidagi mahalliy aholiga yordam berish uchun kichik kasalxonada ishlay boshlaydi. Kunlarning birida uning oldiga Emir ismli kishi keladi. U Efsunning onasiga haydovchi ekanligini aytib, onasi o‘lim yoqasida ekanini bildiradi va qizdan zudlik bilan Istanbulga borishini so‘raydi. Efsun istamaygina bunga rozi bo‘ladi va poytaxtga ketadi, ammo ne ko‘z bilan ko‘rsinki, uni aldagan bo‘lishadi. Esfunning onasi plastik jarrohlik klinikasida bosh shifokor bo‘lib ishlaydi. U kasal emas, shunchaki qo‘lida muammolari bo‘ladi. Ona davolanib olgunga qadar klinikani boshqarib turishni qiziga topshiradi. Ilojsiz qolgan Afsun Istanbulda qoladi. Biroz vaqt o‘tgach, o‘zini haydovchi sofatida tanishtirgan Emir ham aslida tajribali jarroh ekanini bilib qoladi. Bir-birini yoqtirmasligiga qaramay, endilikda ular bir klinikada ishlashiga to‘g‘ri keladi.
“Qog‘oz uy”
Jihan jinoyat huquqi o‘qituvchisi, Aylin muvaffaqiyatli advokat, ularning uchta ajoyib farzandi bor: o‘g‘li Mert va qizlari Jemre va Melisa. Qahramonlarning hayoti dahshatli oqshomlarning birida, Jihan va Eylin o‘z uyida ayol jasadini topgach, butunlay o‘zgaradi. Jabrlanuvchi Jihanning sevgilisi, qotil esa 16 yoshli Jemre bo‘lib chiqadi. Qizi qamalmasligi uchun er-xotin jasadni bog‘ga yashirishga va sodir bo‘lgan voqea haqida sukut saqlashga qaror qilishadi. Ammo ko‘p sirlar fosh bo‘ladi va ideal oila qiyofasi qog‘oz uy kabi mo‘rt bo‘lib chiqadi.
Izoh (0)