Davlat xavfsizlik xizmati Qashqadaryo va Farg‘ona viloyatlarida ikki kishi firibgarlik bilan pora olayotganida qo‘lga tushganini ma’lum qildi.
Ma’lum qilinishicha, Qashqadaryo viloyati Shahrisabz tumani favqulodda vaziyatlar bo‘limi boshlig‘i ikki nafar fuqaroning 2025-yil iyul oyida Favqulodda vaziyatlar vazirligining Shahrisabz va Chiroqchi tumanlari bo‘limlarini kasbiylashtirilgan yong‘in-qutqaruv qismlariga haydovchi vazifasiga ishga qabul qilinganliklaridan foydalanib, go‘yoki ularning ishga kirishlarida ko‘maklashganini ro‘kach qilib, 6 ming dollar talab qilgan.
DXX va Bosh prokuratura huzuridagi departament xodimlari hamkorligida o‘tkazilgan tezkor tadbirda mazkur mansabdor shaxs Shahrisabz tuman FVB ma’muriy binosida so‘ralgan pul mablag‘idan 3,5 ming AQSH dollarini olgan vaqtida ashyoviy dalillar bilan ushlangan.
Hozirda unga nisbatan Jinoyat kodeksining 168 (firibgarlik) va 211-moddalari (pora berish) bilan jinoyat ishi qo‘zg‘atilib, qamoq ehtiyot chorasi qo‘llanildi. Tergov harakatlari olib borilmoqda.
Bu kabi qonunbuzilish holati Farg‘ona viloyatida ham qayd etildi. Xususan, Marg‘ilon shahar Maktabgacha va maktab ta’limi bo‘limi bosh mutaxassisi fuqaroga davlat xususiy sherikchilik asosida bog‘cha ochishi uchun vazirlikda ishlovchi tanishlari orqali ruxsatnoma olib berish evaziga xizmat xonasida 2 ming dollari olgan vaqtida DXX va IJQKD xodimlari tomonidan ushlandi.
Hozirda unga nisbatan Jinoyat kodeksining 168 (firibgarlik) va 211-moddalari (pora berish) bilan jinoyat ishi qo‘zg‘atilib, tergov harakatlari olib borilmoqda.
11-avgust kuni DXX Buxoro, Toshkent shahri va viloyati hududlarida ichki ishlar organlari xodimlari pora olayotganda ushlanganini ma’lum qilgandi.
Izoh (0)