Turk aktyor va aktrisalari shaxsiy hayotida ro‘y berayotgan yangiliklar va ular hozirda nimalar bilan band ekani haqida ma’lumotlarni e’tiboringizga havola qilamiz.
Irem Helvajio‘g‘ludan yangi romantik suratlar
2024-yil oktyabr oyida turmush qurgan taniqli aktrisa Irem Helvajio‘g‘li va tadbirkor Ural Kaspar ijtimoiy tarmoqlarda oilaviy hayotlari qanday kechayotganini muxlislari bilan bo‘lishishda davom etmoqda.
“Muhtasham yuz yil”da kanizak Klara obrazi va “So‘yla, Qora dengiz” serialidagi roli hamda kinodagi boshqa ijrolari bilan ko‘pchilikning ko‘nglidan joy olgan Irem Helvajio‘g‘lu turmush qurish qaroriga kelishi uchun uzoq vaqt o‘ylaganini aytib o‘tdi. Aktrisaning ta’kidlashicha, undan an’anaviy tarzda turmush qurish uchun qo‘lini so‘rashmagan, oila qurish qarori o‘zaro muhokama va kelishuv natijasi bo‘lgan.
Aytach Shashmaz qallig‘i Jemre Baysel bilan birga
Aytach Jemre Baysel bilan “Taqdir o‘yini” serialida boshlangan munosabatlarning davom etayotganini tasdiqladi. U Istanbulning Kadiko‘y tumanida jurnalistlarga bergan intervyusida bu yerga Jemrening taklifi bilan kelganini aytdi. Jurnalistlar tomonidan Jemrening loyihalarini kuzatasizmi, degan savolga Shashmaz ha, deb javob berdi hamda qallig‘i bilan bog‘liq hamma narsaga qiziqishini ta’kidladi:
“Albatta, men Jemre bilan bog‘liq barcha loyihalar haqida bilishim va kuzatib borishim kerak”.
Engin Akyurek doimgidek shaxsiy hayotini sir saqlamoqda
2015-yilgi “Eng yaxshi erkak roli” uchun “Emmi” mukofoti sovrindori, “Agar bulut bo‘lsam”, “Xarom pul, soxta sevgi” teleseriallari orqali mashhur bo‘lgan Engin Akyurek Istanbulning Kadiko‘y tumanida jurnalistlarga qisqacha javob berdi.
Jurnalistlarning: “Janob Engin. Sizni ancha vaqtdan beri ko‘rmadik, biroz suhbat qura olasizmi?” degan savoliga aktyor “Xayrli kech, do‘stlar” dedi va tezda g‘oyib bo‘ldi. Uning bunday xatti-harakati aktyorning xarakteri uchun xosdir. Engin Akyurek shaxsiy masalalarni matbuot bilan muhokama qilmaslik tamoyiliga doimo sodiq qolgan.
Chingiz Bozkurt o‘zining yangi kitobini taqdim etdi
Mashhur “Leyla” serialida Selman rolini ijro etgan taniqli aktyor Chingiz Bozkurt kitob chop etdi. Asardagi ba’zi iboralar Turkiyaning “Chamadon” jurnalida ham nashr etildi. Ushbu asarda u o‘zining bolalik xotiralari, Londonda o‘tkazgan sarguzashtlari va 40 yillik aktyorlik karyerasi haqida fikr yuritdi. O‘z hikoyalarida Chingiz Bozkurt media, siyosat va tarix kabi muhim mavzularga to‘xtalib o‘tdi.
Kitobning orqa muqovasida aktyorning hayotga bo‘lgan qarashlarini aks ettiruvchi satrlar mavjud:
“Hayot murakkab bo‘lishi mumkin, ammo Bozkurt har bir ishga tabassum bilan boqish, o‘z-o‘zini tanqid qilish va muammolarga turli nuqtai nazardan qarashga intiladi”.
Ilker Aksum ota bo‘ldi
Joriy yil 3-fevral kuni “Yettinchi bo‘lmadagi mo‘jiza” filmi yulduzi Ilker Aksum va uning turmush o‘rtog‘i Dilay Ekmekchio‘g‘lu farzandli bo‘ldi.
Ilker va Dilay 2023-yil iyun oyida turmush qurgan edi. To‘ydan ko‘p o‘tmay er-xotin farzand kutayotgani haqida xabar berdi. Juftlik Instagram’da chaqaloqning surati bilan bo‘lishdi va post ostida:
“Sizning duolaringiz bilan qizalog‘imizni bag‘rimizga oldik” deya izoh qoldirdi.
Murat Yildirim va Imon Elbani Dubayda dam olmoqda
“Qora qish” nomli yangi loyihaga tayyorgarlik ko‘rayotgan aktyor Murat Yildirim suratga olish ishlarini boshlashdan avval dam olishga qaror qildi. Aktyor va uning rafiqasi Imon Elbani ijtimoiy tarmoqlarda Dubaydagi sayohati qanday o‘tayotgani haqida bir nechta suratlar joylashtirdi.
Mert Ramazon Demir harbiy xizmatni o‘taydi
Ayni paytda “Qo‘rg‘on sirlari” serialining so‘nggi qismlarida suratga tushayotgan aktyor Mert Ramazon Demir harbiy xizmatga ketish taraddudida ekanligi haqida ma’lumotlar paydo bo‘ldi. Aktyor buning uchun ariza ham topshirgan.
Aktyor muddatli harbiy xizmat turini tanladi: Mert Ramazon bahor va yozda armiyada xizmat o‘tagach, kuzga qadar yangi loyiha uchun tayyor bo‘ladi.
Izoh (0)