Turk kino va seriallarida asosan sevgi yoki jinoyat mavzulari ko‘tariladi, degan yanglish tushuncha mavjud. Ammo bu haqiqatdan yiroqdir. Turdizi olamida chuqur ma’noga ega, bir qarashda darrov anglash qiyin bo‘lgan o‘tkir syujetli loyihalar ham ko‘p. Quyida kutilmagan burilishlarga boy va psixologik jihatdan murakkab bo‘lgan turk seriallarini havola etamiz.
“Nikoh haqida barcha haqiqatlar”
- “Kinopoisk”dagi reytingi: 8,4
- Janr: drama
- Rollarda: Gekche Bahadir, Sumru Yavrujuk, Bertan Asllani va boshqalar.
To‘rt opa-singil Cho‘lpan, Azra, Gunesh va Sanem Istanbulga ko‘chib o‘tadi va yuridik sohada karyera qiladi. Ularning barchasi ajrim jarayonlari bilan shug‘ullanadi. Qizlarning har birining shaxsiy hayoti turlicha rivojlanadi. Cho‘lpan eridan ajrashgan, Sanem nikohga umuman ishonmaydi, Azra baxtli turmush qurgan, Gunesh esa sevgan insoniga turmushga chiqish harakatida. Bir kuni opa-singillarning hayotida kutilmagan voqea sodir bo‘ladi: ularning otasi ko‘p yillar oldin boshqa ayolni deb qizlarning onasini tashlab ketgandi. Shunda qahramonlar oldida o‘z otasini kechirish yoki kechirmaslik tanlovi turadi.
“Qizil xona”
- “Kinopoisk”dagi reytingi: 8,0
- Janr: drama
- Rollarda: Binnur Kaya, Gulchin Kultur Shahin, Baran Jan Eraslan, Sezin Bozachi, Tulin O‘zen va boshqalar.
Turli qahramonlar, siniq taqdirlar va ularning barchasiga bitta psixiatr yordam berishga tayyor bo‘ladi. Har bir qismda tomoshabinlar qabulga kelgan yangi qahramon bilan tanishadilar. Mutaxassis kreslosida esa, “Qo‘rg‘on sirlari” serialidagi Nuket rolidan tanish bo‘lgan, maftunkor Binnur Kaya o‘tiradi. Filmda bemorlar hayoti ko‘rsatiladi, ularning muammolariga chuqur kiriladi va psixoterapevt bilan birgalikda og‘riqli zanjirlardan qutulishga yordam beradigan yechim topishga harakat qilinadi.
“Fi. Chi. Pi”
- “Kinopoisk”dagi reytingi: 7,8
- Janr: drama, melodrama
- Rollarda: Serenay Sarikaya, Ozan Guven, Mehmet Gunsur va boshqalar.
Turkiya uchun noodatiy hisoblangan “Fi. Chi. Pi” serialida tanish chehralar talaygina. Masalan, bosh rollarni Mehmet Gunsur hamda O‘zan Guven ijro etgan. Psixologik triller markazida iste’dodli psixiatr Jan Manay turadi. U muvaffaqiyatli karyera qurib, o‘z sohasining haqiqiy yulduziga aylangan. Muammo shundaki, uning ham qalbida qorong‘i tomonlari bor va bu tomonlar unga balerina Duru yoqib qolgan paytdan boshlab tobora aniq ko‘rina boshlaydi. U sevib qoladi, lekin bu tuyg‘u muhabbatdan ko‘ra ko‘proq qaramlikka o‘xshaydi. Axir Jan psixologik hiylalarni yaxshi biladi. So‘ng u Duru va qallig‘ining hayotini tun-u kun kuzatishni boshlaydi.
“Biz Istanbulda uchrashdik”
- “Kinopoisk”dagi reytingi: 7,6
- Janr: triller, drama
- Rollarda: Oyku Karael, Fatih Artman, Funda Eryigit va boshqalar.
Bu Istanbulda sodir bo‘ladigan juda g‘ayrioddiy va qiziqarli voqea haqidagi serial. Unda sakkizta qahramonning hayoti bir-biri bilan kesishadi, ammo hikoyaning markaziy qahramoni Meryem (Oyku Karayel) bo‘ladi. Har bir qismda xurofotlarning zararli ta’siri, ijtimoiy ziddiyatlar, madaniy to‘qnashuvlar, ruhiy jarohatlar va insoniy ambitsiyalari kabi mavzular yoritiladi.
Film an’anaviy musulmon ayol Meryemning qishloqdan shaharga ko‘chib o‘tganidan so‘ng psixiatrga qatnay boshlashi bilan boshlanadi. Uning doimiy hushdan ketishlari bu tashriflarning sababiga aylanadi.
“Birinchi va oxirgi”
- “Kinopoisk”dagi reytingi: 7,6
- Janr: drama, melodrama
- Rollarda: Salih Bademji, O‘zge O‘zbirinji, Ulash Tuna Astepe, Hazal Subashi.
Butun bir oilaning alamli parchalanishi haqidagi achchiq hikoya. Deniz (O‘zge O‘zpirinchi) va Barish (Salih Bademchi) 10 yildan beri birga yashaydi, lekin endi ular baxtni his qilishmaydi. Cheksiz janjallar, tanbehlar va bir-birlarini eshita olmaslik er-xotinning ajrashish uchun ariza berishiga olib keladi. Bu qaror ularning yosh o‘g‘liga yomon ta’sir ko‘rsatadi. Qahramonlar vasiylik masalalari haqida bahslashayotgan bir paytda tomoshabinlar sobiq juftlikning munosabatlari tarixini: yorqin tanishuvdan tortib hamma narsa parchalana boshlagan fojiali daqiqagacha bo‘lgan vaqtni tomosha qilishadi.
“Qog‘oz uy”
- “Kinopoisk”dagi reytingi: 7,6
- Janr: drama
- Rollarda: Erdal Beshikchio‘g‘lu, Nur Fettaho‘g‘lu, Tuvana Turkay va boshqalar.
Jihan jinoyat huquqi o‘qituvchisi, Aylin muvaffaqiyatli advokat, ularning uchta ajoyib farzandi bor: o‘g‘li Mert va qizlari Jemre va Melisa. Qahramonlarning hayoti dahshatli oqshomlarning birida, Jihan va Eylin o‘z uyida ayol jasadini topgach, butunlay o‘zgaradi. Jabrlanuvchi Jihanning sevgilisi, qotil esa 16 yoshli Jemre bo‘lib chiqadi. Qizi qamalmasligi uchun er-xotin jasadni bog‘ga yashirishga va sodir bo‘lgan voqea haqida sukut saqlashga qaror qilishadi. Ammo ko‘p sirlar fosh bo‘ladi va ideal oila qiyofasi qog‘oz uy kabi mo‘rt bo‘lib chiqadi.
“Shaxsiyat”
- “Kinopoisk”dagi reytingi: 7,6
- Janr: drama, detektiv, kriminal
- Rollarda: Jansu Dere, Haluk Bilginer, Rejem Usta va boshqalar.
Mazkur serial Alsgeymer kasalligiga chalingan qotil haqidagi hikoyadir. Nevra ismli ayol Istanbul politsiyasi qotillik bo‘limidagi yagona ayol ishchi bo‘lib, bir kun kelib uning yo‘li Agah bilan kesishadi. Agah 65 yoshli pensioner, avval sud-tibbiyot eksperti bo‘lib ishlagan. Biroq u tunda qotilga aylanadigan atipik manyak bo‘ladi. Afsonaviy turk aktyori Haluk Bilginer ushbu roli uchun Emmi mukofotiga sazovor bo‘lgan.
Izoh (0)