Qoraqalpog‘iston Respublikasi va Xorazm viloyatidagi ayrim oilalarga ichimlik suvi bo‘yicha xarajatlarini qoplash uchun subsidiya beriladi.
Hukumatning 2025-yil 14-avgustdagi qarori bilan ushbu subsidiya ajratish tartibi to‘g‘risidagi nizom tasdiqlandi. Unga ko‘ra, quyidagi xarajatlarini qoplash uchun subsidiya beriladi:
- turar joyida artezian qudug‘i qazish;
- suv nasoslari va ichimlik suvi filtrlarini xarid qilish hamda o‘rnatish.
Subsidiya mazkur xarajatlarning 90 foizi, biroq BHMning 30 baravaridan (12 million 360 ming so‘mdan) ko‘p bo‘lmagan qismini qoplash uchun ajratiladi.
Ushbu xizmatlar “Yagona milliy ijtimoiy himoya” axborot tizimining Aholini toza ichimlik suvi bilan ta’minlashga ko‘maklashuvchi tadbirkorlik sub’yektlari reyestriga kiritilgan tadbirkorlar tomonidan amalga oshiriladi.
Subsidiya oluvchilarning voyaga yetgan muomalaga layoqatli a’zosi yoki qonuniy vakili “Inson” markazlariga borgan holda yoki mahalladagi ijtimoiy xodimlarga murojaat qilish orqali “YAMIH” ATda ro‘yxatdan o‘tishi mumkin. Bunda “Inson” markazi xodimi yoki ijtimoiy xodim subsidiya oluvchilarning voyaga yetgan muomalaga layoqatli a’zosi yoki uning qonuniy vakili nomidan “YAMIH” ATda ro‘yxatdan o‘tish bo‘yicha so‘rov yuboradi.
Tadbirkor belgilangan muddatda subsidiya oluvchilarning turar joyiga yetib borishi hamda artezian qudug‘ini qazishi, suv nasosi va ichimlik suv filtrini o‘rnatishi lozim. Ishchi guruh tomonidan subsidiya ajratish ma’qullangani yoki rad etilgani to‘g‘risidagi xabar “YAMIH” ATga avtomatik ravishda yuboriladi.
Subsidiya oluvchilar tomonidan nizomga muvofiq ajratilgan subsidiya asosida xarid qilingan suv nasosi va ichimlik suv filtrini boshqa shaxslarga foydalanish uchun berish yoki sovg‘a qilish hamda sotish qat’iyan taqiqlanadi.
Davlat byudjeti mablag‘lari hisobidan Qoraqalpog‘iston Respublikasi va Xorazm viloyatida muhtoj oilalarga bir marta beriladigan moddiy yordam o‘rniga Kambag‘al oilalar reyestriga kirtilgan oilalarga turar joyida artezian qudug‘i qazish, suv nasoslarini o‘rnatish hamda ichimlik suvi filtrlarini xarid qilish xarajatlarini qoplash uchun subsidiya ajratish prezidentning 2025-yil 30-yanvardagi farmoni bilan joriy etilgandi.
Izoh (0)