UFC’ning ikki vazn toifasidagi sobiq chempioni — yarim yengil (66 kg) va yengil (70 kg) vazn toifalarida g‘olib bo‘lgan irlandiyalik Konor Makgregor promoushen jangchilari ro‘yxatidan chiqarilgani haqidagi xabarlar rad etildi.
Avvalroq UFC Roster Watch o‘zining X (sobiq Twitter) sahifasi orqali Makgregorning UFC ro‘yxatidan o‘chirilgani haqida xabar bergan edi. Biroq tashkilot prezidenti Dana Uayt bu da’volarni “to‘liq bo‘hton” deb atadi.
37 yoshli Makgregor 31-iyul kuni dopingga qarshi qayta test topshirganini ma’lum qilgan edi. Shuningdek, u 2026-yilda AQSH Mustaqillik deklaratsiyasi imzolanganining 250 yilligi munosabati bilan Oq uyda o‘tkazilishi rejalashtirilayotgan UFC oqshomida qatnashishga tayyorligini bildirgan.
Prezident Trampning Oq uyda UFC jangi o‘tkazish qarori meni hayratga soldi. Bu men uchun ulkan sharaf bo‘lardi. Menga ishonishingiz mumkin, — deya ta’kidlagan Konor Makgregor.
Ma’lumot uchun, Makgregor so‘nggi bor 2021-yil iyul oyida bo‘lib o‘tgan UFC 264 turnirida oktagonga chiqib, amerikalik sobiq vaqtinchalik chempion Dastin Poryega birinchi raundda texnik nokaut (oyoq jarohati) evaziga mag‘lub bo‘lgan edi. U professional faoliyati davomida jami 28 ta jang o‘tkazib, 22 ta g‘alaba va 6 ta mag‘lubiyat qayd etgan.
Izoh (0)