11-fevralga o‘tar kechasi Rossiya harbiy kuchlari Ukraina harbiy-sanoat kompleksi faoliyatini ta’minlovchi Ukraina gaz-energetika majmuasi obyektlariga raketalardan guruhli zarba berdi. Bu haqda Rossiya Mudofaa vazirligi xabar berdi.
Zarbadan ko‘zlangan maqsadlarga erishildi, deya ta’kidladi harbiy idora.
Ukraina energetika vaziri German Galushchenko mamlakat gaz infratuzilmasi yana hujum nishoni bo‘lganini tasdiqladi.
Xavfsizlik masalasi hal qilingach, hujum oqibatlari aniqlanadi, dedi u.
Keyinroq “Naftogaz Ukraina” Poltava viloyatidagi ishlab chiqarish quvvatlariga zarar yetgani, ammo jabrlanganlar yo‘qligi haqida ma’lum qildi. Shuningdek, viloyat ma’muriyati zarba oqibatida Poltava viloyatining Mirgorod tumanidagi to‘qqizta aholi punkti gaz ta’minotisiz qolganini xabar qildi.
Ukraina armiyasi Harbiy-havo kuchlari ma’lumotlariga ko‘ra, Rossiya jangovar aviatsiyasi Ukraina hududiga jami 19 ta qanotli, ballistik va boshqariladigan raketalarni uchirgan. Bundan tashqari, havo hujumiga 124 ta Shahed hujumchi droni jalb qilingan, ulardan 57 tasi urib tushirilgan va yana 64 tasi joylashuvini yo‘qotgan. Zarbalar Poltava, Chernigov, Xarkov va Cherkas viloyatlariga zarar yetkazgan.
Bu Rossiyaning Yevropaga yoqilg‘i tranziti to‘xtatilganidan keyingi Ukraina gaz-energetika infratuzilmasiga ikkinchi hujumi bo‘ldi. Birinchi ommaviy raketa hujumi joriy yilning15-yanvar kuni amalga oshirilgandi. O‘shanda Rossiya Mudofaa vazirligi harbiylar Ukraina armiyasining Krasnodar o‘lkasidagi “Turk oqimi”ga gaz yetkazib beruvchi “Russkaya” kompressor stansiyasiga hujum qilishga urinishiga javoban zarba berganini ta’kidlagan edi.
1-yanvar kuni Rossiya gazini Ukraina orqali G‘arbiy va Markaziy Yevropaga yetkazib berish bo‘yicha besh yillik shartnoma muddati tugadi. Rossiya prezidenti Vladimir Putin kelishuvni uzaytirishning iloji yo‘qligini tan oldi. Uning so‘zlariga ko‘ra, garchi Rossiyadan yiliga taxminan 700-800 million dollar olgan bo‘lsa-da, aynan Ukraina tomoni bunday imkoniyatdan voz kechgan.
Mayli, biz omon qolamiz, “Gazprom” bunga bardosh beradi, dedi Putin va quvur orqali yetkazib berish o‘rniga suyultirilgan tabiiy gaz eksportini oshirishga va’da qildi.
Ukraina Rossiya gazi tranziti to‘xtatilgandan so‘ng Polsha bilan hamkorlikda Yevropa davlatlarini yoqilg‘i bilan ta’minlashi kerak bo‘lgan Sharqiy Yevropa gaz xabini yaratish ustida ish boshlagani ma’lum qilindi. Ukraina energetika vaziri o‘rinbosari Nikolay Kolesnikning so‘zlariga ko‘ra, Ukraina yerosti gaz omborlari va Polsha suyultirilgan tabiiy gaz terminallari Rossiyadan gaz yetkazib berish yo‘nalishiga muqobil yangi biznes modeli uchun asos bo‘lishi mumkin.
Izoh (0)