Toshkent shahrida Turkiy davlatlar xalqaro universiteti tashkil etilishi haqida avval xabar berilgandi. Bu haqda prezident Shavkat Mirziyoyev 25-yanvar kuni tegishli qarorni imzoladi.
Qarorga ko‘ra, quyidagilar universitet faoliyatining asosiy yo‘nalishlari etib belgilandi, jumladan:
- muhandislik, qurilish, logistika, axborot texnologiyalari va dasturlash, sog‘liqni saqlash, qishloq xo‘jaligi, oziq-ovqat sanoati hamda iqtisodiy va ijtimoiy soha uchun xalqaro standartlarga muvofiq oliy ma’lumotli kadrlar tayyorlash;
- o‘quv dasturlarini xorijiy, shu jumladan, Turkiyaning yetakchi oliy ta’lim tashkilotlari bilan hamkorlikda, shuningdek, qo‘shma ta’lim dasturlari asosida joriy etish hamda ilmiy-tadqiqotlar olib borish.
Istanbul Madaniyat universitetida o‘tkazilgan konferensiyada so‘zga chiqqan Turkiya Oliy taʼlim kengashi prezidenti professor Erol O‘zvar O‘zbekiston va Turkiya o‘rtasida rivojlanayotgan muhim ta‘lim loyihasi haqida gapirib o‘tdi.
“Ushbu universitet Turkiya Oliy taʼlim kengashi, O‘zbekiston Oliy taʼlim vazirligi va O‘zbekiston Respublikasi Oliy taʼlim kengashi o‘rtasidagi o‘zaro anglashuv memorandumi asosida tashkil etilmoqda. Yaqin yillarda O‘zbekistonda universitetlar sonini ko‘paytiramiz”, dedi O‘zvar.
Ozarbayjondan keyin O‘zbekistonda tashkil etilgan mazkur universitetning turk dunyosiga xizmat qilishini ta’kidlagan O‘zvar Turkmaniston bilan ham muzokaralar davom etayotganini ta’kidlagan.
O‘zvar shuningdek, 50 ta universitetda raqamli va sun’iy intellektga asoslangan dasturlar ochilishini qo‘shimcha qildi.
Izoh (0)