Insayderlar ma’lumotlariga ko‘ra, Yelizaveta II vafotidan keyin qirol Charlz 500 million funt sterlingga yaqin meros olgan. O‘shanda bu summa hayratlanarli edi, ammo aslida bu monarx va uning oilasi daromadlarining dengizdagi bir tomchisi xolos. Qirollik a’zolari o‘zlarining hashamatli hayotlarini qanday moliyalashtirishi va ularning qaysi biri boyroq ekani haqida ma’lumot beramiz.
Suveren grant
2011-yilda qirollik oilasi hukumatga daromadli yerlarining katta qismini, jumladan, fermalar va tog‘-kon komplekslarini berdi. Buning evaziga hukumat ikki yillik yer daromadining 25 foizini monarxga beradi. Misol uchun, 2023-yilda Charlz III 86,3 million funt sterling olgan.
Suveren grant mablag‘lari asosan “qirolning rasmiy hayoti” uchun sarflanadi: xodimlar, saroylarni saqlash, bal va tantanalar tashkil qilish xarajatlari uchun. Ammo qirol oilasiga ham mablag‘ ajratishga haqli.
Bukingem saroyi, Klarens-Haus va boshqa monarxning qarorgohlari qirolga “toj huquqi bilan” tegishli — u bu joylarda ta’mirlash ishlari olib borishi, yashashi, xizmatkorlarni almashtirishi mumkin, lekin ularni sotishi mumkin emas. Shunday qilib, qirollik oilasining qiymati 9,5 milliard dollar bo‘lgan mulklari hech qachon hech bir qirolga tegishli bo‘lmaydi.
Ammo Charlz III ning shaxsiy ko‘chmas mulklari ham bor. Masalan, Shotlandiyadagi Balmoral qasri 118 million, Norfolkdagi Sandringem qarorgohi 73 million dollarga teng va u istagan paytda ularni sotishi mumkin.
Shahzoda Uilyam va malika Ketrinning to‘yida qirolicha ularga XIX asrga oid Sandringemdagi Anmer-xoll qarorgohini sovg‘a qilgan. Shuningdek, uelsliklarning Vindzor qasridagi Adelaida kottejida ham qarorgohi bor, ular 2022-yilda u yerga ko‘chib o‘tgan va hozir shu yerda yashaydi. Albatta, Londonga tashrif buyurganlarida ular Kengsington saroyidagi 20 xonali to‘rt qavatli taunxausga joylashadi.
Shahzoda Garri va Megan Markl
Manbalarga ko‘ra, Megan va Garrining asosiy pul aktivi ularning Montesitodagi uy-joyidir. Sassekslar Kaliforniyaga ko‘chib o‘tishlari bilanoq elita qishlog‘idagi uyni 14,95 million dollarga sotib olishgan. Ular bu uyni ipotekaga olishgan — 5 million dollarni birdaniga to‘lashgan, ammo deyarli 10 million dollarni nech yilda berishlari noma’lum.
Malika Anna
1976-yilda Elizabet II qiziga Glostershirdagi Gatcombe Park mulkini sotib oldi. O‘shanda qirolicha uning uchun taxminan 750 000 funt to‘lagan, ammo hozir yer-mulkning qiymati taxminan 29 million dollarni tashkil qiladi. Malika hali ham mulkdagi xonadonlardan birida yashaydi, qo‘shni xonadonda esa Zara va Mayk Tindoll bolalari bilan yashaydi. Shuningdek, Annaning Londondagi Sent-Jeyms saroyida shaxsiy qarorgohi ham bor.
Meros
Charlz III
Hozircha Charlz meros miqdori bo‘yicha rekordchi hisoblanadi. Avval aytganimizdek, qirolicha Yelizaveta II katta o‘g‘liga taxminan 500 million dollar meros qoldirgan — bir qismi naqd pulda, qolgan qismi esa zargarlik buyumlari va san’at asarlari ko‘rinishida. Shuningdek, Charlz 1399-yildan buyon har bir monarxga o‘tadigan Lankaster gersogligini boshqaradi. Ammo u ko‘chmas mulkka kirmaydi, chunki qirol gersoglikka egalik qilmaydi va uni sota olmaydi — u faqat har yili undan daromad oladi. 2022-yilda monarx gersoglik daromadidan 24 million funt sterling olgan.
Shahzoda Uilyam
Uilyam 30 yoshga to‘lganida, malika Dianadan merosning o‘ziga tegishli bo‘lgan qismiga ruxsat oldi — manbalarga ko‘ra, bu 12,5 million dollarni tashkil etdi. Shuningdek, unga onasidan zeb-ziynatlar meros qolgan, masalan, malikaning yoqut va brilliantli nikoh uzugi va boshqalar.
Shahzoda Garri
Garri ham 12,5 million dollar meros oldi — bu pulsiz u va Megan Kaliforniyaga ko‘chib o‘tisha olmasdi. Diananing qolgan mol-mulki va pullari uning 17 nafar cho‘qintirgan farzandi va eshik og‘asi Pol Barell o‘rtasida taqsimlandi.
Ammo Garri bilan bog‘liq bir tushunarsiz jihat bor. Opraga bergan intervyusida u Britaniya qirollik oilasidan chiqib ketganidan keyin moliyaviy yordam to‘xtatilganini aytgan. Biroq 2021-yilda Klarens-Hausdagi manba qirol Charlz Garri va Megan Marklga mustaqil yashash uchun “sezilarli miqdorda” mablag‘ berganini ma’lum qilgan edi.
Malika Ketrin
Taxt vorisi bilan turmush qurishdan oldin malika ota-onasining kompaniyasida va kiyim-kechak sotiladigan onlayn do‘konda ishlagan, lekin mutaxassislarning fikricha, bu unga katta boylik keltirmagan. Biroq Keyt ota-onasining biznesini sotishdan daromad olishi mumkin edi — Kerol va Maykl Middlton 2023-yilda bayramlarni tashkillashtirib beruvchi kompaniyasi Party Pieces’ni sotishgan.
Shuningdek, Keyt Suveren jamg‘armadan oladigan mablag‘ va shahzoda Uilyam, qirol Charlz va qirolicha Yelizaveta II tomonidan sovg‘a qilingan zargarlik buyumlariga ham ega.
Shaxsiy daromad
Charlz III
Qirol va shahzodalar ham ishlaydi — ayniqsa hozirgi kunda, monarxiya xalqqa yaqinroq bo‘lishga intilayotgan paytda. Masalan, 1990-yilda qirol Charlz o‘zining Glostershir shahridagi fermasida yetishtirilgan mahsulotlarni sotish uchun Duchy Originals organik mahsulotlar brendini tashkil qilgan. Natijada kichik bir firma Buyuk Britaniyadagi eng yirik organik mahsulotlar brendiga aylandi. Ammo Charlz bu sotuvlardan kelgan daromadni o‘ziga olmaydi — barcha mablag‘ Uels shahzodasi xayriya fondiga yo‘naltiriladi. Masalan, 2009-yildan boshlab fond 42,6 million dollar olgan.
Qirol Charlzning ekologiyadan tashqari ikkinchi ishtiyoqi — rasm chizish. U hali shahzoda Charlz bo‘lgan paytda ham Buyuk Britaniyadagi eng muvaffaqiyatli rassomlardan biriga aylangan. Charlz akvarelda landshaft manzaralarini chizib, ularni xayriya tadbirlarida namoyish qilgan. Ma’lumotlarga ko‘ra, 1997-yildan 2006-yilgacha Charlz taxminan 2,5 million dollar daromad olgan va har bir dollarni Uels shahzodasi xayriya fondiga yuborgan.
Shahzoda Uilyam
Charlz III ko‘proq ijodga moyil bo‘lsa, Uilyam doimo armiyada xizmat qilgan. 2006-yilda u Britaniya Qirollik harbiylariga qo‘shilib, Qidiruv-qutqaruv kuchlari vertolyot uchuvchisi bo‘lgan va yillik maoshi 74 000 dollarni tashkil etgan. 2013-yilda Uilyam iste’foga chiqadi, lekin ikki yil o‘tib qaytib, havo tez yordamida uchuvchi bo‘lib ishlaydi va yillik 62 000 dollar maosh oladi. Mutaxassislarning ta’kidlashicha, ushbu ishidan kelgan barcha daromadni shahzoda xayriya ishlariga bag‘ishlagan.
Megan Markl va shahzoda Garri
Britaniya qirollik oilasi muxlislari Megan va Garrining qirollik oilasidagi hayotlari haqidagi shov-shuvli filmlarini yaxshi eslashadi — va, albatta, ular buni bepul qilmagan. Manbalarga ko‘ra, 2020-yilda Netflix va Sassekslar 100 million dollarlik shartnoma imzolashgan. Loyihalardan birida “Garri va Megan” serialida, gersog va gersoginya o‘z shaxsiy videolarini ulashib, qirollik oilasi a’zolari sifatida boshdan kechirgan “kurash” haqida so‘zlab berishgan. Insayderlarning fikricha, 2024-yilda Garri va Megan ushbu platforma uchun yana bir film chiqarishadi.
Megan Markl, shuningdek, uch yilga 30 million dollarlik Spotify shartnomasini ham imzolagan. Unga ko‘ra, Megan taniqli shaxslar ishtirokida ayollarning huquqlari haqida “Archetypes” podkastlarini yozib borishi kerak edi — masalan, Peris Hilton, Serena Uilyams va Mindi Kaling uning mehmoni bo‘lgan. Ammo keyinchalik ma’lum bo‘ldiki, gersoginya shartnomada ko‘zda tutilganidan ancha kamroq podkast yozgan, shu sababli Spotify top-menejeri Bill Simmons juftlikni “firibgarlar” deb atagan.
Sassekslarning yana bir katta daromadi Garrining “Zaxira” nomli memuarlari sotilishi bilan bog‘liq. Mutaxassislarning hisob-kitoblariga ko‘ra, shahzoda ushbu kitobdan 20 million dollar daromad qilgan va kitob Amazon’da bestsellerdan biriga aylangan.
Izoh (0)